黃婉伶法女唱英語
「我每過一段時間就會換鈴聲，一個月換一次，𠵱家呢首《HotelSong》係一個法國歌手唱嘅英文歌，個歌手叫做ReginaSpektor，呢首歌係我喺CD整落手機，我好鍾意隻歌嘅旋律，好好聽，又唔會好嘈，我最怕係好嘈嘅鈴聲。因為會成日轉歌，所以之前我都有整過自己嘅歌，最近覺得呢首歌啱聽，所以即刻轉囉。」
採訪、攝影：駱華齡、王崇穎、張俊銘、楊潔雯
胡杏兒平和交響樂
「我嘅鈴聲係一啲交響樂曲，因為我比較多電話，我之前用過一啲比較嘈吵嘅歌，電話係咁不停響，搞到好鬼嘈，令到個人都好煩躁。換咗交響樂嘅歌，聽落成個人都好平和，心情開朗好多。我都有試過用自己唱嘅歌做鈴聲，不過響嗰陣時好似有啲唔好意思，怪怪哋咁嘅。」
吳亭欣可愛儍豬豬
「我個電話鈴聲與眾不同，因為自己鍾意小朋友，所以個鈴聲都係小朋友嘅叫聲同講嘢聲，個鈴聲不斷會有個小朋友講儍豬豬儍豬豬……好可愛㗎，聽起嚟成個人都開心啲。啲人成日都話我儍吓儍吓，兼且個鈴聲唔會咁容易同人撞，所以就覺得幾好。」
關楚耀長情hiphop
「50cent嘅呢首《JustaLil'bit》係屬hiphop類型，一開始有印度音樂感覺，好吸引我，只要聽過一次就會記得。我平時好少轉鈴聲，例如呢隻歌都係兩年前嘅作品，只要好聽就keep住用。其實我唔會將自己嘅歌做鈴聲，不過媽咪同細妹都會，媽咪電話一響就同朋友介紹，而細妹就設定我打畀佢就播我嘅歌做鈴聲。」
