獅子錢莊套制服可能靚絕銀行界，員工福利都可能好過同行。八方收到風，獅子錢莊決定送份生日禮物畀員工，唔係利是唔係股票，而係生日有薪假期一日，員工可以喺生日月份內任擇一日放假慶祝，人人有份，不過各位滙豐員工咪開心住，因為呢項德政，暫時只得內地職員受惠。
一國兩制香港冇份
滙豐（中國）行長兼行政總裁翁富澤日前透過電郵向下屬報喜，生日假即日生效，而且追溯至今年1月1日起計算，1至8月生日嘅員工，都可以喺今年內享用生日假。有香港滙豐員工同八方講，個零月前已知內地同事有生日假，office流傳香港都可能研究吓，有個經理級職員話咪咁大諗頭，「一國兩制，內地有香港唔一定有份。」
滙豐發言人表示，本港未有類似安排，但人事部經常會就員工福利作出檢討及研究，目前香港員工享有不少有薪假期及醫療福利，是內地員工尚未享有。
滙豐係本地最大私人僱主之一，八方希望佢唔好「大細超」，若然佢帶頭推行生日假，其他公司照跟，包括八方在內幾百萬打工仔都可能受惠都唔出奇。香港都少數公司有生日假制度，美聯物業同Neway卡拉OK都畀員工生日放假，生日嗰日唔使受老闆氣。