今日係大部份學校嘅開課日，呢期焦點一定係14歲會考狀元何凱琳，同9歲神童沈詩鈞；不過，大學未有咁快開學，大家仲未有機會見到兩個資優神童返大學嘅風采。不過，華華前幾日就同財經界資優靚女、富豪酒店（078）太子女羅寶文傾偈。
華華冇講錯，寶文中學時跳過級，人哋讀國際學校由Grade7到Grade13，讀足7年，佢就淨係讀咗Grade8到Grade11，4年讀完，15歲就升大學，只係比何凱琳大一年入大學，仲唔係資優學生？點知寶文好謙虛話：「我唔係資優，只係勤力啫。」
跳級或妨礙心靈發展
寶文14歲做香港傑出學生，15歲攞埋獎學金去美國讀心理學，19歲以一級榮譽成績畢業，勤力果然有回報。華華細個嗰時都好勤力𠺝，點解……
寶文後來又話，喺香港讀小學時，的確覺得課程幾易，但制度唔畀跳級，老師於是准佢堂上睇其他書。咁對於資優兒童何凱琳，同9歲神童沈詩鈞咁早讀大學，呢位過來人又點睇呢？
佢對9歲就讀大學有啲保留，「書本知識固然緊要，但心靈發展都好重要，太細個嘅資優學童可以畀佢讀原來級別，但跳級讀標青嗰啲科目，好似國際學校咁。」
中途轉學冇咁易融入
呢啲好明顯係寶文經驗之談，中學時寶文本來讀本地女子中學瑪利曼，但返咗半年，媽咪就同佢轉去國際學校，仲一轉校就跳級，「轉校最初半年最深刻，因為最辛苦。」原因係當時開學已經半年，同學仔已分好一堆堆玩，佢中途插入自然唔易融入，「到飯堂大家一班人食飯，我就自己一個食，都幾孤獨㗎。」所以佢提醒家長，同仔女轉校，最好開學時就轉。
咁寶文細個嗰時邊科最標青呢？佢話讀書成績科科都好，尤其鍾意唔使記嘢、只要分析嘅科目，因為分析能力學咗就跟你一世，對嗰啲一味死記嘅歷史科之類就怕怕。不過，有得讀就點都難佢唔到，唔使讀嘅先考起，咁即係邊科最差？係PE（體育），「可以科科A，呢科就攞D，我手腳唔配合嘛。」
[email protected]
