聯合國國際勞工組織一份報告話，以每個禮拜開工48個鐘，作為勤力指標，美國得18%打工仔達標，引嚟唔少美國網民還擊。KSQueens喺《CNNMoney》討論區話：「我係會計師，每個禮拜做足40個鐘，季結時仲要OT，超過50粒鐘，未計每日搭車兩個半鐘，返到屋企，又要湊細路，咁點算懶。」mmgg就話：「用喺見客嘅時間，似乎冇計埋喎。」
未計見客時間
R.HigginsJefferson揶揄話：「應該叫班所謂專家同學者，出去搵工，我相信，佢哋一定會將大部份工作，卸畀助手處理。」不過，jthawks批評美國人，真係越嚟越懶，新一代淨係諗住靠阿爸阿媽，要保住競爭力，美國人就要快啲醒，佢仲話：「我有個中國朋友覺得，一份工年薪4萬美金（約31萬港紙），已經好好，但美國人可能要6萬美金（約47萬港紙），先至滿足，如果兩個人工作能力差唔多，點解老闆唔慳番2萬美金。」
根據聯合國資料，按勤力指標，美國喺20個國家中，排第14，比全球第二大經濟體系日本高1級，但及唔上瑞士、英國；如果同泰國、墨西哥呢啲發展中國家比，更加冇得揮。最勤力嘅係南韓同秘魯，勤力比率約50%。