羅寶文細個嗰陣攞過香港傑出學生獎，應該係非常好學嗰隻高材生，點知佢居然同華華講，讀書時唔鍾意返學，但就好鍾意9月1日呢個日子。吓，使唔使講到咁玄呀！
原來9月1號係寶文生日，佢話中學時讀國際學校，遲啲先開學，所以生日可以玩得好盡興。
華華細個放暑假，好鍾意頭嗰幾日就將所有暑期作業做晒，咁成個暑假就可以喪玩。寶文就相反，佢話，讀書時每到長假臨完結都會唔開心，一返學就等放假，雖然次次都準時交假期功課，但通常係最後一刻先臨急抱佛腳。
仲有，寶文好鍾意傾偈，坐佢隔籬嗰個就慘，成日被佢撩講嘢，搞到俾老師鬧，試過有次要罰企㖭。老師冇佢符，惟有安排個好靜嘅同學同佢坐，寶文一樣有辦法，「咪同坐前面嗰個同學傾囉。」服未！
細路仔都有「我的志願」，寶文細個最想做律師，可以幫人伸張正義，「大學畢業時都迷惘過，試過去美國環球片場學做導演，諗住將來拍勵志電影鼓勵人心。」後來發覺嗰個圈太複雜，唔適合佢。
9月去扶貧
於是轉去律師行做，體驗律師生涯，「但嗰間係專接商業案嘅律師行，同我諗嘅律師有出入。」
最後佢選擇從商，幫爸爸打江山；不過，熱心幫人嘅心冇變，佢話大概9月尾就會跟樂施會去內地扶貧。