曾患厭食症的袁潔瑩（現名袁瑩），年前成功克服病症，回復健康。前晚袁潔瑩再次暴瘦現身CK時裝騷，體重下跌到不足100磅，原來她早前抑鬱症復發，導致再患上厭食症，自閉自卑又怕見人，幸好她厭食初期已向醫生求助，現正調理中，希望她堅強面對，早日康復！
久未露面的袁潔瑩與同性密友阮嘉欣前晚在中環遮打花園欣賞美國名牌CalvinKleinCollectino時裝騷，袁潔瑩再次暴瘦，雖然上身包到冚，但露出的大腿、小腿瘦到現青筋，面上也瘦得人中下陷，我見猶憐！她大談自己拍的豐胸廣告說：「我今次駁咗長髮，又着婚紗，同埋有性感三點式。」
「睇緊中醫調理」
提到近日暴瘦不少，袁潔瑩即承認厭食症復發，現時跌至不足100磅，正在調理中，她說：「磅數唔講喇，總之唔夠100磅啦，我都睇緊中醫調理。因為之前我情緒病翻發，以前最瘦嗰陣有抑鬱，可能自己太無聊，或者太得閒，有少少厭食翻發，醫生都話我乖，一開始發病就去睇，不過自己真係有啲自閉，希望月中生日有多啲朋友陪我啦。」
談到抑鬱症患者容易有自殺傾向，袁潔瑩對此說：「我冇，不過，都唔知做人為乜！」
「怕面對群眾」
記者指袁潔瑩與阮嘉欣拍拖可以散散心，她說：「唔使講，出面都話我哋拍拖啦，不過我𠵱家需要一份工作多過一份感情。我喺朋友中，成日覺得自卑，又自閉唔想出席公開場合，怕要面對群眾同傳媒。」
採訪：RitaLeung
攝影：DickyChan
