四叔成為亞洲股神，大概亦陸續將會有新書出籠，講述四叔投資心得。雖然無一本會是親筆撰寫，連口述筆錄都欠奉，但必定本本都寫到似層層，情形就像市面上一本二本畢菲特投資心經101，個個當正自己是四叔徒弟。
作為事事搶先一步的我，要先天下之「優」而「優」。當其他人仍然埋首苦幹，一於用六百字就全面寫出四叔的投資心經，他日有任何一本講述四叔買龍頭龍尾股的心得，又或者如何在跌近千二點時用廿億撈貨的書本面世，都只不過是向我學習。
四叔能夠戰無不勝，身邊一定滿佈能人異士。四叔雖然有錢有腦，但千幾億的投資組合只夠大市一日成交，始終國際大鱷聯手仍然是富可敵國。知己知彼，要有一班從大行挖角過來，知道市場有甚麼異動的Banker，為四叔分析度橋收風。再者，人非草木，四叔一日都只有廿四小時。總要有班叻仔睇睇資料，度幾款衍生工具應市，才可以保持長勝。善於用人，有專家幫拖，是第一章要先行交代。
千幾億的組合，萬一沽貨隨時推冧大市，買貨亦會大踏步掃上。廿億在低位撈貨但撈得未夠盡興，證明四叔眼光奇準，吼正差不多跌定才大舉出擊。只有在發慌要掟貨的人掟得七七八八，才出現不夠賣盤讓四叔的廿億承接。由此可見，四叔未有心急入貨而越買越低，相反，跌定掟定後一買，轉眼就掉頭上升一千點。四叔睇市睇得準，淡定，不會動輒瘋狂入貨。這幾點，有排寫。
最後，這本未出籠的書，還要寫四叔懂得借勢。有意無意之間，將本簿仔讓記者瞄一瞄，令散戶即刻入市照跟。四叔漫不經心，又為自己組合升值幾十億。畢菲特的公司上市，買甚麼股票無得遮瞞；四叔那間是私人公司，想出用簿仔的辦法代替年報，功效一樣，夠晒深度。新書的名稱，應該叫「DepthNote」。
方卓如網址： http://fongcheukyu.blogspot.com