失常天后BritneySpears噚日應承咗為拉斯維加斯新開張夜店LAX做開場嘉賓，點知臨時有傳聞話佢心情唔好甩底，好彩最後佢都有現身，令班宣傳人員鬆一口氣。當晚出席嘉賓仲有之前曾經同Britney傳過緋聞嘅靚仔魔術師CrissAngel等。
另外，Britney首復出作《GimmeMore》日前已經派台同擺上YouTube度畀人試聽，竟然獲得甚高評價，有樂評人大讚新歌無論係歌詞、編曲同佢把聲都好sexy，完全配合歌名。而另一首有鹹濕歌詞嘅《ColdAsFire》網上亦有得聽。消息指唱片公司再次對Britney充滿信心，決定於今年11月13日推出相隔4年嘅全新大碟。
