對於經常住酒店嘅人嚟講，最怕住着啲有污糟嘢嘅房間，所以盡量都唔會揀啲例如有4、13等唔好意頭號碼嘅房間。不過喺驚慄片《1408》裏面嘅男主角尊古錫（JohnCusack）就堅持要入住死得人多嘅凶房間，希望可以同鬼魂近距離接觸。間房有幾邪？大家只要將房間數字加埋一齊就知道！ 撰文：戶川淳
改編自驚慄大師史提芬京（StephenKing）同名小說嘅《1408》，下星期四就會喺本港上映。成齣戲以曾經主演過《驚天動地》（ConAir）嘅41歲男星尊古錫為主線，佢飾演一名固執嘅恐怖小說作家，有日去到一間旅館，管房經理早已勸告佢唔好入住1408號房，但尊古錫好唔信邪，既想拆穿鬼房間嘅假象，又希望透過房間同去世女兒見面，結果攞命嚟搏。
視像求救
呢間房先後死過56人，房間擺設冇乜特別，點知個床頭鐘突然變成倒數計時器，預告男主角會喺一個鐘頭內被嚇死。佢打算離開房間，先至發現房門鎖咗，爬窗時竟然又發現全座酒店外牆只剩下1408嘅窗戶。喺呢段僅有嘅時間內，尊古錫逐一見到前房客嘅寃魂。房間裏頭有部可以上網嘅電腦，尊古錫就利用視像向外界求救，點知警察爆門竟然發現房間空無一人。
故事玩嘅係心理上嘅恐怖，所以導演都唔希望用太多電腦特技去強行營造詭異場面。但尊古錫喺房間先後遇上雪崩、海嘯等超自然奇景，導演都迫不得已用咗400幾個視覺特效拍攝鏡頭。除咗男主角，曾演出《毒蛇嚇機》（SnakesonaPlane）、扮演管房經理嘅森姆積遜（SamuelL.Jackson）亦為電影製造唔少緊張同恐怖氣氛。
詭異數字
事實上電影裏頭所有數字都好詭異，除咗房間冧巴外，無論係大門密碼6214、酒店所在地址門牌2245，抑或係第1個房客嘅死亡年份1912年，4個數字加起嚟都等於13，都咪話唔邪。難怪導演同眾演員拍完電影之後，都話今後會對「1408」號房避得過就避，大不了就退房喎。
老翻小八卦：滿佈《閃靈》影子
電影改編自作家史提芬京嘅同名短篇故事，收錄喺2002年發行嘅短篇小說集《Everything'sEventual：14DarkTales.》內。起初佢只打算寫幾頁紙收錄喺佢本非小說書籍嘅附錄度，教導讀者點樣由草稿變成故事，點知越寫越有，最後變咗完整故事。
唔知係唔係27年前同樣改編自史提芬京嘅《閃靈》（TheShining）太深入民心嘅關係，《1408》好多地方都有《閃靈》嘅影子，譬如故事同樣發生喺酒店，而同樣係作家嘅男主角喺經歷可怕事件後，性格同舉止都徹底改變，唔怪得會俾人話部片有抄襲成份啦！