德發集團（928）之前因為核數師畢馬威對07年度業績持保留意見，仲拒絕連任，嚇怕投資者，觸發洗倉潮，股價一度急插超過四成。主席郭榮嗱嗱臨出嚟澄清，話畢馬威只係針對美國聯營公司SinoLegend發表保留意見。
以為件事告一段落？上個禮拜五，華華見到德發嘅董事變更通告，喺公司做咗31年嘅老臣子李煜文，以健康同移民理由走；邢詒春就以有其他工作喺身嘅理由，唔得閒做獨立非執行董事。唔係華華多心，只係公司正值多事之秋先嚟唔撈，其他人就會多嘢諗吖嘛！
有人唔做，自然要搵人頂替，郭榮就搵咗阿哥郭鑑泉個女郭彩霞做執董，姪女今年40歲，87年加入德發，有成廿幾年嘅製衣行業經驗，每年董事酬金36萬。至於獨立非執董就搵咗唔多人識，喺宏利做高級區域經理嘅周計良擔任，董事袍金一年都係得六皮嘢。
𠵱家公司有4個執董，一個係郭榮自己，另兩個就係阿哥同姪女，閉門一家親。唔知一家人團結係咪真係可以「其利斷金」呢呵？