鄭融同男子組合EO2前晚喺九龍灣國際展貿中心舉行「音樂遊擊第二場──鄭融xEO2」，徐濠縈、周國賢甚至鄭融嘅緋聞男友劉浩龍都有嚟捧場。着住性感低胸裝嘅鄭融，成晚同EO2勁歌熱舞，波濤洶湧；染晒白髮白鬚嘅EO2則當眾換衫，除剩條孖煙囱，然後又玩淋水同潑水，令全場氣氛高漲。
避忌企開
EO2同鄭融完騷前請晒嚟捧場嘅歌手上台唱歌，雖然劉浩龍都有上台，但就好避忌咁企埋一邊，原本鄭融都開過聲叫劉浩龍唱歌，但劉浩龍竟然扮聽唔到行開，莫非因為鄭融經理人鄒世龍都有嚟捧場，所以特別要避忌吓？事後劉浩龍話前晚係主辦單位商台叫佢去睇騷，但鄭融就話係同EO2一齊請劉浩龍嚟，兩個人完全唔夾口供。
問到鄭融點解同劉浩龍喺台上冇乜交流，佢話：「我當時喺台上表演緊，我都有行過佢身邊，又唔係合照時間，唔需要避忌，同埋之前都影過合照。」
