馬季下個禮拜日開鑼，噚日沙田馬場搞咗個季前嘉年華，細路都可以入馬場，仲有兩位稀客，民政局德成局長同賭王何鴻燊都有現身。八方未聞德成局長愛跑馬仔，噚日欣賞馬術表演睇到津津有味，問到馬會想每季加多五個賽馬日，但就扮聽唔到即閃。
賭王面對勁敵威尼斯人，佢話未驚過，至於星際單拉老虎機食詐糊事件，佢笑笑口話𠵱啲係人哋家事，佢唔想插嘴，不過佢旗下賭場未發生過同類蝦碌嘢。此外，馬會行政總裁應家柏透露，馬會撥出2,000萬贊助奧運馬術隊買四匹馬參賽，據講香港已佔咗六個參賽名額，一批種籽選手早前動身去德國受訓，最fit嘅選手會為國爭光。