環保團體「環保觸覺」炮轟銀行分行冷氣太勁，嘥電又凍到員工變雪條，不過銀行職員可能適應咗喺低溫下工作，對冷氣溫度麻木晒，反而對制服靚唔靚更敏感。綜合前線、後勤人員同網民意見，似乎最多人認為獅子錢莊套制服最靚，着出嚟一啲都唔失禮。
名師設計多配搭
八方噚日食晏時間路經中環，發覺獅子錢莊套制服紅、黑配襯，確係幾醒目搶眼。呢款制服由國際知名時裝設計師JasperConran設計，兩年前推出時，獅子錢莊形容新制服「充份展示銀行從業員的專業形象」，成個系列包括半截裙、長褲、圓領襯衫配領巾、扣鈕襯衫、短褸及中褸，員工可以自由配搭，隨時成個星期唔會重複。
八方見兩位身形高䠷嘅滙豐女職員步出總行，頓時眼前一亮，驟眼睇以為係空姐㖭！唔怪得其他銀行職員都讚啦。其他銀行員工對制服讚彈不一，中銀制服以灰色為主調，有人話着咗似怨婦，又有人話似師奶，負責設計嘅鄧達智解釋，「銀行係一個好傳統同保守嘅行業，設計要莊重，唔可以太開放或新潮。」鄧達智又話設計嗰時已經考慮埋舒適度同office溫度，所以用料輕薄，唔怕焗親。至於寶哥哥寶號嘅制服似乎最多人彈，事關一年四季同一套，悶到嘔。