朱慧敏自從同梁榮忠嘅車震事件告一段落後，發展明顯比梁榮忠好，佢前晚同鍾嘉欣、馬浚偉及李天翔喺中環為無綫新劇《金石良緣》開工。
鍾嘉欣跨欄跌倒
劇情講述不務正業嘅李天翔原本對鍾嘉欣不懷好意，最後卻轉移目標，喺酒吧遇上因心情唔好而買醉嘅朱慧敏，李天翔色心起，將飲醉酒嘅朱慧敏帶到公園施暴。鍾嘉欣同馬浚偉獲悉趕去救佢，拍攝期間鍾嘉欣跨欄時唔小心跌倒，好彩冇大礙。
為咗拍攝呢場戲，朱慧敏瞓身演出，李天翔唔單止騎喺佢身上，仲借位錫佢面珠。着住吊帶上衣嘅朱慧敏冒住唔連戲嘅危險，都要勁打底防走光，佢話：「我着多咗件黑色tubetop防走光，希望觀眾睇嘅時候唔會留意到穿崩問題。」朱慧敏話現實中就算好失意都唔會買醉，佢話：「我只會做運動。」
馬浚偉表示《金》劇兩位演員譚小環同曹永廉分別喺今年拉埋天窗，不過佢話：「我要搵多啲錢先結婚。」鍾嘉欣就希望可以喺30歲前嫁得出，佢話：「因為我好鍾意小朋友。」
