徐濠縈、黃偉文、楊采妮、周汶錡和張玉珊等，前晚出席名牌YvesSaintLaurent在灣仔舉行的07秋冬時裝騷。談到陳奕迅（Eason）10月舉行的演唱會掀起撲飛潮，不僅Eason要迴避想買飛的朋友，連Eason嫂徐濠縈一樣叫苦連天。
按輩份親疏處理
徐濠縈說：「日日都十個八個order，十年冇見嘅朋友都打嚟，其實真係唔關我事，啲飛係陳家瑛處理。我直情要避電話，但又有SMS同email，好誇張！連奶奶都無端端打嚟，話要十張飛，咁佢梗係最緊要啦。」
徐濠縈很高興老公個唱反應熱烈，對於撲飛要求，現時就要按輩份親疏分三級處理，她說：「奶奶、媽咪同拉姑（狄波拉）咪係最top優先處理，拉姑好支持，每場都要一行飛，尾場仲話要留四行呀！其次咪係日日見嘅朋友囉。」她謂連囡囡同學的家長、老師，甚至學校校長都要求訂票，她笑言為囡囡前途着想，要優先處理校長的訂票。
此外，日前有台灣婦女打胎盤針時染瘋牛症，搞美容的張玉珊說：「打呢類嘢，要認清來源，始終有不法商人，聽聞瑞士打就好安全。」
採訪：林妙萍
攝影：葉君海
