女神童包瘦療程
行山陽光古法燒脂
勁運動自通淋巴去水腫
啖啖菜排毒瘦身
14歲女神童何凱琳噚日返中大開學，繼續係傳媒焦點，幾十個記者追住佢採訪，令一年一度公式化開學禮有啲新意。凱琳話由於之前忙於處理註冊入學手續，所以冇去O'Camp，噚日先正式有機會認識新同學，希望記者以後唔好跟實佢，否則佢難以融入正常校園生活。一般學生開學例行公事買書包、校服、新書，神童異於常人，有乜搞作？
凱琳噚日打扮樸素，粉紅色恤衫同揹住嗰個橙色書包都係新買，書包上繼續掛住個福娃同烏龜公仔，升讀大學似乎童心未泯。有人問凱琳會唔會減肥，佢好坦白講早有此意。細細個已經明白「收身」、齊家、治國、平天下呢個大道理，IQ果然高人一等。凱琳話中大成個山咁大，佢一於用最傳統方法，喺山頭行嚟行去收身。打算減幾多同𠵱家幾重，佢怕羞唔肯講，只係話目標減到BMI正常。
目標減到BMI正常
凱琳運動神經唔太發達，最怕上體育堂，𠵱家揀咗打網球，因為以前未玩過，入大學試吓新嘢，流多啲汗加速排毒。除咗做運動，飲食都要配合先可以減磅，佢話媽媽擔心佢住宿舍冇啖好食，所以第日喺宿舍佢會自己煮飯食，拿手餸菜係苦瓜炒瘦肉、灼菜、蒸蛋同冬瓜湯，少肉多菜，全力收身。唔通凱琳想搵男朋友？佢面紅紅話「唔知呢！」又話拍拖係好遙遠嘅事，都係讀好書先。
大學近年興搞師友計劃，搵有頭有面人士指導學生，八方建議由張玉珊做凱琳mentor，一來凱琳入讀逸夫書院，由六叔契女做佢mentor順理成章，加上收身係張小姐強項，凱琳喺大學上完堂再上「收身堂」，啱晒。
校鬧鐘要問宿友先
新生入學難免有啲烏龍嘢，凱琳首年報讀生化、哲學同醫學概論等科目，佢話之前唔知要去唔同地方上堂，所以報讀嘅科目上堂時間接近，根本趕唔切上堂，經教授提醒先識改。相信凱琳𠵱家真正知道「大」學有幾大。
中大安排凱琳同師姐同房照顧佢，凱琳初嘗獨立生活，有啲驚同宿友唔夾，連校鬧鐘都話要問過對方先，佢話有心理準備要遷就其他宿友，希望盡快適應halllife。至於大學生最熱衷嘅課外活動──做兼職，凱琳話冇佢份，因為多數要15歲以上先請，反正中大全費資助佢學費，凱琳唔好心急搵錢，專心享受校園生活仲好啦。