數碼達人：最勁WarGame空降PS3<br>幽靈小隊16人互片

數碼達人：最勁WarGame空降PS3
幽靈小隊16人互片

仲記得舊年春季Xbox360推出《GRAW》嗰陣，唔少機友都俾佢靚到絕嘅畫面、臨場感十足嘅音效同極度爽快嘅玩法吸引住，搞到谷機之餘單Game又好賣，令只有徹底弱化PS2版應市嘅Sony咬牙切齒！冇計啦，鬼叫嗰陣未出PS3咩。事隔年幾，當然要嗱嗱聲搬番隻《GRAW2》出嚟搶吓市場，始終咁正嘅WarGame可遇不可求，啱晒成班朋友連線上網互片。
文：陳福榮

外國Game網攞滿分

向來比「虹彩六號」講求團結得多嘅「幽靈小隊」，縱使過往喺PC同家用機出咗好幾集，不過論影響力點都及唔上舊年嗰隻《GRAW》。事關作為另立名號嘅半舊不新作品，佢引入咗唔少震撼兼且爽快嘅對戰場面，冇以往咁Hardcore反而令更多機迷愛戴。所以相比起當時其他版本，360版真係超班到暈，亦因為咁PS3老虎都要出隻續集嚟頂住先！雖然已經遲過人哋半年，但人有我冇點都唔啱數，惟有諗多啲獨家元素嚟做賣點。結果呢隻PS3版喺外國都叫備受支持，有Game網畀佢拎滿分，隔咗咁耐都仲係咁正，認真唔嘢小。

■組隊時可因應各士兵嘅能力同特性嚟選擇。

■喺狙擊模式中，所有景觀都做得幾仔細。

延續上集發展劇情

本系列啓蒙者TomClancy係超級軍事迷，旗下作品大部份故事都懶有根據，所以上集《GRAW》就曾引起墨西哥政府不滿，話描寫得太有煽動性！到咗《GRAW2》成班軍佬依然要打救陷入群雄割據局面嘅未來墨西哥，軍事強人係咁挑起火頭，好似《MetalGear》咁引發核武危機，搞到美帝想唔幫文人政府都唔得，再派「幽靈小隊」上戰場。
基本嚟講，佢嘅系統同前作分別唔大，但勝在FineTune晒做得唔夠完善嘅地方，例如遙控小機體變得較易操縱、設有更多屈機武器等等。但令人奇怪嘅係，居然冇得SetR2Trigger做開槍，同其他FPS好唔同！不過由於上集冇出過PS3版，加上質素同之前PS2差九條街，對未曾接觸過嘅人嚟講故事方面可能會有啲𢱑頭。

■敵我雙方以唔同顏色嘅標記嚟顯示，一目了然。

■駕駛遙控小機體監察遠處戰況，操縱方面已比上集改良。

上網合作最多16人

如果你同人講，話玩FPS係享受故事、鍾意一支公玩射鴨仔嘅話，肯定俾人笑到面黃；皆因玩呢類射擊遊戲，同真人互動點都比起靠電腦精神得多。呢隻Game嘅重點，就係網上連線搵對手決一勝負或者搵Partner組隊玩Co-op！難得嘅係多人連線部份內容多到有啲出乎意料，比單人模式襟玩好多，例如Co-op就有特別炮製嘅「巴拿馬戰爭」6個任務，具備合作同互相比拼成份，唔使靠班隨時失靈嘅AI幫拖。至於對打就最多可同時16人進行，今集連線時畫面並未有因為多人Link機而大幅跌Watt，同單人玩冇分別，值得一讚。

■從高而下伏擊戰，係發揮團體合作嘅好機會。

玩高清仍有缺點

相信好多人應該會似我咁，玩PS3都係想用盡屋企部高清電視。不過《GRAW2》嘅畫面最多只係支援720p，連1080i都唔到確實係意猶未盡；再者有唔少場景嘅色調偏向暗暗沉沉，清晰度硬係爭啲；兼且FrameRate唔太穩定，嚴格嚟講單論畫面真係及唔上360版。不過諗深一層，廠方又點會花大筆錢幫你將PS3再Upgrade上去呢？雖然係咁講，佢嗰啲爆風和火花效果做得好正，或者係PS3開發工具內建嘅資料庫夠勁揪啩？另外，PS3今次亦追加咗只此一家嘅對戰地圖，有啲仲係來自元祖版《GhostRecon》，對於TomClancy長期Fans嚟講，當然歡迎至極。