到「信德中心」內之澳門賽馬會食飯，遇到評馬人馬萬靈，此君喺中文大學讀地理，唔知點解，一畢業就入咗馬圈寫馬，中文英文一齊嚟，於茲十幾年。中大崇基學院唔知係唔係地近馬場，出咗幾位著名評馬人，例如馬萬靈嘅大師兄馬恩賜（社會系），余伯樂（中文系，未畢業），方駿輝（中文系），影響所及，位於山頂嘅新亞書院亦有人畢業後就寫馬，就係張美德（哲學系）。以前聽余伯樂講過，佢喺崇基上完堂，行路去馬場，甚至晨早行去睇晨操，睇睇吓，對刨馬嘅興趣多過刨書，於是學咗蓋茨，未讀完書就離開大學！
馬萬靈話已經離開中英雙語雜誌《賽馬世界》（RacingWorld），唔做總編輯咯，七月底轉投澳門賽馬會做新聞秘書（相當於香港馬會鄭國銘嘅位）。問佢是否仍然住響香港，馬萬靈話：「搬咗去澳門咯，住響松山。」松山近住東望洋，聽講係高尚住宅區，環境相當唔錯。
同席亦有月刊總編輯H，編輯H喜歡美食，晚上回家最喜歡睇飲食節目，由無綫亞視睇到有線、Now，以至中央電視台嘅飲食節目，佢都睇晒，問你服未。最弊佢講每一個節目，左丁山都搭唔上口，因為未睇過也。編輯H話：「左仔，乜你咁悶㗎！」騎騎，悶就悶啲，自己晚上只有兩個小時睇電視，一定係睇新聞台CNBC、Bloomberg、CNN、BBC等等，再望吓HBO等電影台就上床瞓覺，到咗周末就成晚睇英超，邊度有時間睇飲食節目吖。
既然編輯H對飲食咁有研究，問佢邊度有靚嘢食。編輯H話：「呢呢，就在眼前，澳門賽馬會會所有六間主題餐廳，各有特色，包括日本菜、潮州菜、上海菜、粵菜、西餐等等。粵菜『黃金閣』有一味豉油雞好正，周星馳與幾位知名富豪經常來此食豉油雞。」真係咁正？第日提編輯H請食飯，試吓先。食食吓，編輯H又演講「你哋睇過套電影劉三姐未？女主角黃婉秋好靚女，佢最近在央視介紹美食，仍然咁靚……」在座女士個個話唔知有劉三姐呢套戲，梗係啦，話睇過咪即係話畀人知自己幾多歲！