以前見到啲祖國同胞，香港人嘴蔑蔑開口埋口叫人做阿燦、自由行，家吓「港燦」都唔知幾恨多啲「自由行」落嚟香港。
麥肯錫香港分公司全球副董事林國灃噚日同華華講，𠵱家年薪5萬蚊美金（即係37.78萬銀人仔）以上嘅富裕階層，喺中國嘅人數已經超過150萬人，每年增長速度仲有超過15%。呢班富戶有一個好大特點，就係自信驚得起風浪。
點解華華咁講？因為麥肯錫搵咗呢班富裕人士做調查，發覺佢哋肯接受「適度」或「高」風險嘅比率高達41%；相比之下，香港嘅大眾富裕階層（港人入息最高的首20%人士），肯接受「適度」或「高」風險嘅比率只係37%，新加坡仲低，只得24%。
林國灃話，呢批投資者並非長線投資者，仲未了解股市係咩，𠵱家只係跟大隊搵食，佢哋一心去博，唔知股市呢家嘢高風險、高回報。梗係啦，當你見到上海A股升破5100點，個市火紅到不得了，你開心都嚟唔切，邊識驚啫，何況大陸國市咁封閉。華華諗，如果炒股資金可以坐「直通車」嚟香港，或者內地股民可以順勢學到，股市係充滿「危」與「機」。