活躍於樓市嘅科達地產主席湯君明，前幾日出席好友黎汝遠嘅祝捷晚宴，戥人高興。咁畀面，原因係湯君明話自己喺「摩王」嘅公司打工，係佢嘅督導員。
聽到華華一頭霧水，首先湯君明口中嘅「摩王」，原來係黎汝遠。至於貴為科達地產主席，冇啦啦做乜去人哋公司打工呢？佢話，因為黎汝遠成日忍唔到手，買咗嘢太快放，所以佢就負責㩒住摩王，叫佢忍一忍，唔好放住。哦，明白！
先排股市勁旺，帶旺埋樓市，摩王就袋成千五萬要搞慶功宴，睇怕湯君明都袋唔少，點知佢話，03年之後，雖然都賺到錢，但賺得少，難度高咗。
真係謙，其實華華好佩服湯君明嘅眼光，仲記得佢之前講過，搵啲位置好嘅舊樓，就好似玩尋寶遊戲，隨時山雞變鳳凰。唔知佢近排又捉到幾多隻山雞呢？
發展商靠包裝「呃表叔」
點知佢轉咗口風話：「靚嘢冇平，平嘢冇靚，山雞始終都係山雞，變唔到鳳凰。尤其一啲盤本來係山雞，只係發展商化濃妝扮鳳凰啫。」吓，乜話？不過，華華知道湯君明一向敢言，講嘢一針見血，所以發展商唔係好鍾意佢，但講事實又怕乜啫，佢仲話，發展商靠包裝「呃表叔」，呢個講法，湯君明都唔係第一次同傳媒講㗎啦。
估唔到敢鬧地產商嘅，除咗華華，仲有湯君明，你好嘢！
[email protected]
湯君明近年樓市賺蝕
湯君明話山雞變唔到鳳凰，華華就摷番近幾年佢買賣過嘅樓，你哋認為當中有幾多係山雞，又有幾多係鳳凰。
年份：2007
樓盤：售出紅山半島單號D屋，樓高兩層，實用面積2680呎，物業06年7月以2680萬元購入，現以3280萬元售出，1年獲利600萬元
年份：2007
樓盤：購粉嶺聯捷街榮輝商場舖位，作價2120萬元，呎價530元；現時舖位市值呎租可達12元，回報高逾22厘
年份：2006
樓盤：購入筲箕灣海安中心一籃子商廈，作價4000萬，呎價1300元；預期回報可由現時約6厘，提升至逾8厘
年份：2006
樓盤：斥資2680萬元購入紅山半島洋房收租，預期月租可達12萬元，回報高見5.3厘
年份：2005
樓盤：3.7億元購入淺水灣道115號，樓面地價每方呎不足1萬元，斥資3000萬元翻新出租，由14伙改為10伙，複式單位佔4個，翻新後租金三級跳。今年初完成翻新工程後，呎租由6萬多元升至20多萬，至今已租出4伙
年份：2004
樓盤：以5000萬元買唐乃勤南灣道12號物業，講明舊業主會再租住，怎知唐先生住了3個月走人，單位丟空半年，索性7500萬元賣出；物業其後升值逾億，好聽點是賺了2500萬，實質少收2500萬
年份：94年至今
樓盤：內地投資並不理想，經過13年，交了1億多元「學費」，賬面雖賺一倍，實際上無利可圖，因為法制、稅制不健全，加上政策市，外滙不能自由進出
唔夠大佬湯君年狠
湯君明父親湯養浩，1952年帶住家人由上海嚟香港定居，66年成立科達公司，專做牆紙、窗簾、梳化布生意，於60年代開始投資物業。
湯君明早年喺父親公司幫手，甚至代父出面洽購物業，因而結識唔少老行尊，為佢日後投資物業打下基礎。
湯君明兄長係湯臣集團（258）創辦人湯君年，湯君年早年隻身去台灣打天下，娶咗一代女俠徐楓，有兩個仔，之後轉戰香港同大陸，04年湯君年因病英年早逝，湯臣集團𠵱家由徐楓同個仔湯珈鋮打理。
湯君明曾經同傳媒講，同哥哥愛拼愛衝嘅性格唔同，佢自己向來穩陣，買樓多數用嚟投資，所以唔鍾意俾人叫炒家。
今年56歲嘅佢，依然享受單身貴族嘅生活。