記者G與一位建築師閒談，講到紮鐵工人罷工，建築師有啲埋怨，話紮鐵工人唔開工，阻慢工程進度，好驚位地產發展商詐型。當然承建商可引用「不可抗力」條款，指罷工引致嘅損失，唔使承建商上身。但如此一來，雙方關係會緊張起嚟，影響長期關係。你知啦，發展商每日蝕息，唔係嘢少。
左丁山聽完，對記者G講：「你好禮貌，又或者唔記得，呢位建築師不時反對新建設嘅。試問新建設項目難上馬，啲紮鐵工人邊度會好景？」記者G嘆一聲：「世事好矛盾，帶唔同嘅帽，會講唔同嘅說話。你咁講，我就記得，長毛曾經反對清拆皇后碼頭，現在佢強力支持紮鐵工人罷工。」
矛盾也者，今時今日紮鐵工人之冇咁好搵，與九七時差好遠，皆因九七前工程大旺，基建地盤與起樓地盤多到數唔晒，紮鐵工人日薪去到千二蚊或以上，一星期開足六日工。𠵱家喎，大地盤、大工程數目，比九七差一大截，而工人數目冇少到，故此薪酬點會上升吖。基於不同理由，西九下馬，啓德繼續曬太陽，添馬艦政府總部一拖再拖，沙中綫變成失蹤綫，現在重新講過，開工日子有排等……地鐵港島西綫諮詢需時，中環填海工程一再阻滯，地產商勾地經常勾唔到，市建局重建市區，次次俾人鬧……加加埋埋，建造業（包括紮鐵工人）嘅失業率（9.5%）跌不下去。
以上所言，並非話反對保育、反對環保，而係想指出，上述建築師、長毛議員、職工盟等等個人或團體一時一樣，反對新建設項目時，講到義正詞嚴；支持紮鐵工人罷工時，十足為民請命。其實如果真正為工人着想，李卓人一派不如與林鄭月娥坐低，傾清楚各項條件，尋求妥協，喺發展與保育環保之間，找到平衡，以後唔好再爭拗咁多，拖延工程，啲工人會多謝佢哋。點解唔講工聯會呢？工聯會好聽話嘅，你明白嘅啦。張建宗想解決紮鐵工人罷工之事，冇咁易，佢最好搵埋林鄭月娥與李卓人展開「對話」。