AppleGirl終於誕生！籌備了接近1個月的選拔大賽，前晚順利舉行。眾望所歸，勇奪冠軍的是由頭帶到尾的熱門4號鄧鈺鈴，亞軍是另一熱門2號陳煦晴，季軍則是細孖3號鄭嘉恩。成功非僥倖，能夠過到5大評判的關，贏得總有道理的。勝出了，3位AppleGirl開心的說：「我哋會繼續努力㗎！」
記者：葉雪芯
攝影：陳陶鈞、陳偉強、黃子偉
鳴謝：AmazeFloral&Gift（北角英皇道651號科匯中心11樓1106室/25771470）、DazzleSpirea、MOCCA、ARTINI
（中）冠軍 4號鄧鈺鈴
好開心贏得今次比賽，雖然表演不算最好，我好都滿意自己淡定同膽量，對住咁強勁嘅評判陣容唔怯場，𠵱家諗番都覺得自己好犀利，哈哈！我畀自己70分，希望大家仲會支持我！
（左）亞軍 2號陳煦晴
很意外！其實覺得自己表現失準，我輸在經驗唔夠，不過以咁短嘅準備時間來講，總算滿意，我畀自己75分。以後想繼續在主持方面發展，希望有機會學多啲！多謝支持！
（右）季軍 3號鄭嘉恩
無諗過會得季軍！今日用平常心去面對，所以好輕鬆，我好滿意自己嘅表現，希望以後可以有多啲發揮嘅機會。雖然今次家姐輸了，但佢一樣戥我開心，大家一齊分享喜悅！
5大評判昅到實
勝出的AppleGirl要代表蘋果副刊做代言人，還要當上Online主持這工作，除了樣貌，口才、執生能力亦唔少得。決賽當晚5大評判包括專欄作家李怡、香港小姐冠軍李珊珊、名模楊崢、著名攝影師葉青霖和形象顧問張學潤。當晚才藝表演包括勁歌熱舞、三文兩語唱歌、敲擊樂、拉二胡等。評判雖然覺得參賽者經驗不足，但普遍實力算不錯。無論贏輸，睇睇評判有咩講，袋錢落你袋呀，聽住啦喂！
張學潤:個個都幾可愛，幾順眼。實力幾平均，冠軍有經驗當然着數啲，而且好淡定；我特別鍾意亞軍，好普通嘅唱歌，不過識得表現自己語言天份。
葉青霖:睇樣嚟計全部都Good，但才藝方面就要再努力。做主持唔係得個樣就得，最重要係方向同思維清晰，口才要好、淡定大方。冠軍的確具備呢啲條件！
李珊珊:睇樣幾舒服。我自己選美出身又做過主持，所以好知道佢哋心情。我畀分睇感覺，今日冠軍各方面都平均，畀我印象好好。細孖（季軍）條件亦好好，談吐得體！
李怡:個個都好靚女！不過比賽時間太短，有才華都睇唔晒。但從對答、表演中，知道佢哋經驗尚淺。但後生就係本錢，有機會要發揮最好的一面畀大家睇！
楊崢:淨睇相片我已經揀中冠、亞軍。我最鍾意亞軍，佢年紀咁細都表現得咁得體，好難得，而且佢仲識得用唱歌將自己的優點表現出來，睇得出佢有變通能力！
出場前後台狂背歌詞
比賽機會只得一個，怯場在所難免。為了表現到最好一面，賽前個個都準備十足，在後台好似千手觀音一樣，一邊化妝一邊Set頭，一邊準備上台表演項目，我見到都戥佢哋緊張！
比賽開始高下立見
為了比賽艱辛準備，到正式上場一刻，夠唔夠料，醜婦都終須見家翁。不過他們緊張起來甩漏一定會有。多位評判都說，有無才藝唔緊要，才藝可以慢慢練，最緊要揀對表演項目，識得如何表現自己最優秀一面，咁先係一個主持應有的條件。雖然唱歌不對Key、拉唔啱音、錯拍子，但一臉淡定和評判對答，加埋笑容搭夠，亦挽回不少分數。
完了比賽食咗先講
比賽總有輸贏，冠軍始終只得一個。不過即使輸了，其實都不一定是失，贏到經驗，贏得前輩指點教導，甚至贏得友誼，咪仲緊要！
