大波動的8月終於過去，在這高低波幅超過4500點、恒指以創新高收市的月份中，香港股民究竟口袋裏多了幾多錢，會否好似啞子吃黃連──有苦自己知？
別說冠一沒有提醒閣下，8月個市驚濤駭浪，9月可能更加驚心動魄，信焉？投資者目前要面對兩座壓頂之山，其一便是美國次按衍生的信貸危機對經濟損害程度如何，還待揭曉。
次按雖是冰山一角，但蔓延至信貸市場「拉閘」，迫使聯儲局水喉、水閘齊開，就算暫時能穩住陣腳，並不代表問題已解決。無論是樓市影響消費，以至信貸收縮窒礙投資，縱使股市有「無形之手」力托，美國經濟不無好像已撞向冰山的「鐵達尼號」般，甲板上的人在歡樂今宵、載歌載舞、船艙下不少「工作」人員正在努力搶救，希望大步檻過。
其二是中國這由天津開出的「北水自由行」列車，人人以為條條水喉射香江之際，為甚麼遲遲未見啓程？巧合的是，財長金人慶突然辭職，會否與這列車未攞pass扯上關係？上面賣賣吓「飛」，點解又唔賣住？難道有人報錯料，話港股可能被美股「隊冧」，需要北大人射水救亡。領導人正行埋去想擰開個水喉掣之際，突然見港股由低位狂抽，無啥問題而暫時按下，如果有何變卦，所謂的「春江鴨」豈不變「掛爐鴨」？
股市死飆爛飆，係驚死你哋唔信，抑或真係明天更加好？冠一不才，無法預知，更無能力解答上述問題。那麼港股升浪會否與美股一樣欲罷不能？去問「股神」或「超人」啦！