睇《歲月風雲》，見到梁靖琪加拿大香港兩邊走，現實中Toby一樣係咁，仲試過帶咗幾個海關同佢都見唔到嘅「小朋友」去加拿大再返香港。Toby話自己揸車未見過靈異事件，只係試過喺車度「聽到」啲懷疑鬼話。
文：嘴嚼爺
話說Toby中學時代喺加拿大讀書，有一次放假返香港就同朋友仔去郊外旅行，人有三急又四野無人，細路仔唔識世界，唔知係咪因為咁而惹咗幾個「小朋友」跟住佢喇。
當日Toby喺郊外玩一路都冇事，直到坐車走，就喺車度聽到有人叫媽咪，當時架車只得Toby同佢啲朋友，但點解佢咁肯定人哋係嗌佢呢？因為其他朋友都聽唔到。嗰晚之後一直都冇咩特別事發生，但唔知係咪因為車廂冇陽光照射又冇宗教擺設，所以每次搭車，Toby都會聽到「阿仔」出聲搵媽咪。
Toby開頭都懷疑係幻聽，所以一直冇理，直到佢返加拿大，情況開始嚴重，夜晚會聽到床邊有幾個細路仔打波嘅聲音，最恐怖係仲要識講廣東話！後尾搵咗師傅幫手，師傅話原來係班「小朋友」跟咗Toby去加拿大。
而佢哋點解喺車先會出聲？原來係因為佢哋都係因為汽車意外而去咗另一個世界，所以搭親車都要搵媽咪。
最後師傅叫Toby燒啲嘢可以令「佢哋」離開，不過Toby就好好心地，等到返嚟香港先燒，話費事「佢哋」唔識英文仲要留喺加拿大。
照顧咁周到，唔怪得知人哋叫你媽媽啦……