揸AudiS3辣跑嘅又南，話冇飆車你信唔信？如果佢話同紙紮車飆過一轉，你又點睇？問佢自己有冇揸車撞鬼經歷，佢周圍搵木摸：「我就冇，TouchWood，死喇，冇木㖭，真係冇木喎！不過坐朋友車就遇過兩次。」
文：嘴嚼爺
話說第一次喺屯門公路，佢個Friend突然嘩咗一聲，之後問又南喺倒後鏡見唔見到有嘢，見唔到嘢嘅又南心已經寒緊：「喂，你唔好嚇我呀！邊度呀！真係冇喎！」朋友仔就話：「有架紙紮車跟住我哋呀！」「咁你仲唔開快啲？」「我踩油佢咪知我哋見到佢？」「係喎！咁點呀？」靈異嘢，最後梗係一眨眼就唔見咗啦。
之後有一晚，又係呢個Friend，今次地點係西沙公路。西沙公路出名多人飆車，嗰晚佢個Friend就定好多，去到西沙茶座附近，就氣定神閒咁話：「咦？有架紫色GTR啄住我哋喎。」又南望一望倒後鏡：「喂，邊度呀？」「咩呀？啄到好近喎？」「吓？又嚟？我真係見唔到喎！咁邪？快啲撇甩佢啦！」「嘩！人哋架GTR嚟㗎！」正喺你一句我一句之間，紫色戰神又突然消失咗喇。
之後佢同其他朋友講番，原來前幾日報紙都有新聞報道，嗰日啱啱有架紫色GTR喺西沙炒咗，情況嚴重，個司機仲當場死亡呀……唔係巧合得咁交關呀？
雖然兩次都睇唔到，一味聽個Friend講，但睇唔到，會唔會仲驚呢？其實，啲經歷咁恐怖咁驚嚇，又南你會唔會係平時得罪咗呢個Friend，自己又唔知呢？