十四歲會考神童何凱琳唔使讀預科，直入中大，係一件好事。十四歲而考會考考得咁好，肯定有資格讀大學。已經退休嘅一位朋友「懲教L」有兩位千金，早已在美國大學畢業，記得當年就係考完會考之後，憑優異成績申請入到美國大學，唔使讀預科；何凱琳考到八A，中文科5*，英文5級，算係九優一良嘞，中大唔收佢嘅話，美國一定有大學向佢招手。一位老友教授T每年喺美國好留意香港放榜，直情直接打電話搵啲十優、九優狀元過去佢任教間大學，拍心口代搵獎學金。一位九優女生對報紙講好想去美國MIT讀書，但限於環境，恐怕不能成事。見報後，教授就安排咗呢位女生讀完中六就去咗MIT，同佢搵埋獎學金㖭。
所以話，優質學生大把人搶，中大能夠留住何凱琳喺香港，直情係好事，只要何凱琳能夠在EQ上冇問題，融入大學生活，讀書冇話唔掂嘅。經紀K講過，佢畢業嗰年，有一位二十歲女生考一級榮譽，計番轉頭，女生係十六歲入大學嘅。何凱琳直到十五歲先至成為正式醫科生，到時十五歲，只係比上述女生細一年啫。
左丁山見過唔少十四歲中學三年級學生，發覺佢哋未必能夠企起身講話三分鐘。但係電視機前，見到呢位何凱琳侃侃而談，說話得體，面對記者依然好淡定，不禁讚嘆：「十四歲小女孩點樣學到咁好口才㗎！」除咗天份之外，佢嘅學校與家教，必然有功勞。說話能力咁好，六七年後做醫生之時，與病人溝通或者做助教，唔會有問題，再到外國交換、交流一年，或深造一輪嘅話，前途無可限量。
聽講有人去網上謾罵何凱琳，不知出於甚麼居心，人哋夠叻，夠口才，唔使妒忌嘅，亦唔好拿自己與何凱琳相比，人比人，比死人，何必自尋煩惱。左丁山自小畀阿媽鬧「失篤炮」（鄉下話，蠢蛋咁解），小學留級，英文交白卷，食咗英文老師贈送嘅藤條炆豬肉唔知幾多次（以前嘅阿媽話抵打，唔會向教育署投訴老師），所以特別敬重佩服天才，希望佢哋個個好似丘成桐、陶哲宇咁成功！