《爸爸閉翳》裏面麥長青飾演嘅呂家齊，玩車震同狐狸精偷情，最後東窗事發，俾蒙嘉慧飾演嘅金美鑽識穿，搞到婚都結唔成，現實中嘅麥包好專一，全靠揸部Jeep先追到𠵱家嘅老婆大人。識得麥包嘅人都知道佢好鍾意車，十多年間曾先後擁有最少14部，以Jeep佔最多數，對Jeep咁情有獨鍾，梗要搵佢試吓三菱部最新嘅Pajero3.8喇，話明任劈唔反車喎！
記者：梁美甜
攝影：陳陶鈞
Jeep仔做月老
麥包自言到24歲至考牌，聽罷即時懷疑，事關對鍾意車嘅人嚟講絕對係遲，未及問明原因，麥包不自覺地道：「我以前諗住搵到錢之後請司機揸吖嘛，點知搵唔到錢咪自己嚟囉，哈！」我也跟着笑起來。隨後佢更自爆當年追到麥太都係靠部車，「嗰時佢（麥太）揸緊寶馬Z3，我就揸緊豐田部Prado，佢要車屋企人出入時就問我借部吉普車，借吓借吓咪得咗囉！」鬼馬，若非麥包夠風度同氣量，毫無條件幫忙都贏唔對女方嘅好感啦；加上神女有心，襄王又有意咪「得」咗囉！其實當年麥包最想買嘅係Pajero唔係Prado，可惜當時Pajero要轉款，否則月老車絕對係Pajero而非Prado！
瞓車瞓足三星期
好多藝人都喜歡揸Jeep或七人車，因為開工往往不分晝夜，Jeep仔同七人車就可以提供唔少空間俾佢哋休息。麥包笑言：「我試過因為拍劇，連續三個星期都係喺部Jeep度瞓，如果唔係唔夠內褲，時間可能仲長！」可想而知藝人生活並非容易。由於長時間同部車相處，所以麥包揀車都有幾樣特定要求，就係Headroom要夠（頂頭位）、司機位可以瞓到覺、內櫳多置物位。「我自己都有番咁上下份量，車櫳空間就梗係要有番咁上下，好多時拍劇要戴頭套，個Headroom唔夠要又拆又戴都幾麻煩！」司機位可以攤唞就唔難理解，咁要那麼多置物位嚟做咩呢？「擺嘢囉！因為我多濕碎嘢，而且好多時開緊工仲要傾吓自己盤廣告製作生意，所以多啲格咪可以放多啲資料囉！」
家有兩架大車
麥包就話自己純粹鍾意揸車，對車唔係好有研究，但見到最新頂級版嘅Pajero3.8MIVECExceed-X即時猛昅，「3.8公升嘅四驅車肯定夠力，點劈都得！外形斯文咗喎，我都係鍾意惡啲；個地台仲比舊款高咗㖭；內櫳都幾大，啱我仔仔囡囡，佢哋鍾意大車。咦！有天窗好喎，空間感大好多……（蠱惑地笑）仲可以同靚女去睇星星㖭！」又話無研究，但就說得頭頭是道。佢成日提起屋企人，「我𠵱家有兩部車，一部Jeep同一部七人車。老人家上落方便，成家人出入又坐得晒，舒服又開心，係咪？」見麥包笑得咁開心就足以證明佢幾咁重視屋企人。此時電話響起，見麥包表情勁冧講電話：「掛住我呀？我都係！」Sweet爆！
任玩唔會反
三菱話呢架車點玩都唔反，咁大口氣，等麥包劈完一輪，梗係輪到車版仝人一齊劈番夠本。
車版齊Say
老編阿龍：我最鍾意狠劈，3.8公升起圍的確勁，穿梭泥氹同沙地間打8字一樣咁得心應手。
記者美甜：代理講到明點揸都唔反，可以盡情試；軚輕易操控，腰線高視野清楚，部車夠馬力好爽好去！
記者C記：估唔到我咁嬌滴滴都揸得掂，掟彎掟到有啲驚，但操控畀到我信心，好玩！
攝記艾歷士：軚太輕，入急彎無咩快感，容易Overturn；軚快過胎時間難掌握，不過部車好爽好有力。
記者丹尼斯：性能比先前的3.0版本強得多，四驅系統也讓我可輕鬆在泥地打圈跑。
三菱Pajero3.8MIVECExceed-X
引擎：3,827c.c.V6SOHC
馬力：252ps/6,000rpm
扭力：338Nm/2,750rpm
傳動：5前速INVECS-II半自動波箱，可選擇式四驅系統
查詢：環宇汽車（24119511）
