唐寧幫道具兔覓新主愛心爆棚

唐寧幫道具兔覓新主愛心爆棚

唐寧早前演完舞台劇《爆谷殺人狂》後,難得有10多天的假期,她沒有選擇出埠度假休息,反而四出奔波,只為一隻兔仔尋找一主好人家。原來唐寧早前拍戲,有隻「賓尼兔」被當作道具,但拍完戲之後就無人理,最後她收留了被遺棄的小兔,經過多天的奔波,仍找不到兔仔安身之所。

唐寧很愛小動物,家中養了多隻狗,不能再收養早前拍戲後遭遺棄的「道具兔」,她說:「因為屋企養咗幾隻狗,唔可以將隻兔仔放喺屋企養,唔係一定會變做點心,𠵱家暫時放喺朋友間舖度寄居,我試過去愛護動物協會,點知嗰度𠵱家都有50幾隻兔仔等人收養,已經迫爆廠,隻兔仔係垂耳好似賓尼兔嗰種款,其實好可愛,估唔到搵人收養都咁難,啲人養動物之前真係要諗清楚,唔好貪得意就買,玩完一輪之後就唔要,佢哋都有生命,搞到愛護動物協會都冇晒位。」

拍戲整死蜥蜴

動物經常在電影中出現,唐寧表示絕對不會將自己的寵物借出來拍戲,她說:「我之前有部戲都有隻蜥蜴,間公司一次過買咗三隻,諗住可以輪流代替咁用,我原先諗住拍完戲就收養佢哋,但到最後全部都死晒。」

發夢被人追殺

此外,她表示雖然完成舞台劇演出,但至今對一切仍念念不忘,還受到角色的感染,有一段時間夜晚睡覺會發噩夢,夢見被人追殺,唐寧說:「我已經上咗癮,今次真係好難得經驗,做舞台劇要識得執生、唔可以NG講錯對白,試過有場戲我唔小心打爛咗隻杯,一地都係玻璃碎,但我要赤腳跳舞,當時個心好亂,但成班對手都好幫我,即刻執生加對白叫我着番對鞋,做到好似劇情要打爛隻杯咁,令我學到好多嘢,好想有機會再做。」
採訪:魯萍 攝影:陳偉權
服裝:Treshei、SistyrMoon
髮型:JamesofLobby

演完舞台劇的唐寧坦言還受到角色影響,晚上會發噩夢。

唐寧(右)表示演舞台劇令她獲益良多,已上了癮的她盼望再有機會演出。 資料圖片