有綜藝天王之稱嘅台灣綜藝節目主持人吳宗憲，佢喺台灣挹翠山莊嘅豪宅本周一懷疑俾人槍擊，噚日有台灣報紙話，佢屋企有超過四百多個彈窿，同留低百幾個彈殼，吳宗憲已經向台灣警方備案，仲要求將事件保密。有傳事件因財務糾紛而起，黑幫以槍擊作出警告。
但負責案件嘅台北市信義分局噚日表示懷疑有遊客用彈弓或BB彈射擊佢屋企旁嘅路燈，燈泡破裂，並唔係乜嘢槍擊案，吳宗憲報警係想告人要求賠償，同希望警方加強巡邏。吳宗憲噚日喺陽明山拍嘢，佢話：「全案交給警方偵辦，我現在不知該說甚麼。」仲話今日下午再公開交代。
呢間屋吳宗憲四年幾前買落，市值超過3000萬港幣，佢老婆同四個仔女都喺度住，父母就住隔籬，鄰居包括導演朱延平，朱延平噚日接受訪問話：「他家大得誇張，每個登山客路過都會指指點點，有點樹大招風。」
撞親記者不顧而去
此外，噚日有台灣電視台記者因為追訪吳宗憲，俾對方架車撞親要去醫院治理，仲報埋警，但吳宗憲冇落車了解就走咗。
