任賢齊、范冰冰、徐子珊同余慕蓮主演、張堅庭執導嘅新片《合約情人》，前晚喺尖沙嘴舉行首映。余慕蓮曾經話過好想拍咀戲，導演張堅庭原本拍咗場扮奶媽嘅余慕蓮俾小齊輕吻臉頰，但呢場戲最後俾人剪咗。小齊同余慕蓮前晚喺首映禮，徇眾要求重演咀戲，余慕蓮表現風騷，小齊就好抗拒同尷尬，最終佢只係同余慕蓮擁抱，但佢見到范冰冰時就好熱情咁面貼面，有啲厚此薄彼喎！
講到同余慕蓮嘅錫面戲，小齊話：「拍嗰陣我都好緊張，佢話從來冇同男仔拍親熱戲。錫佢個嘴，我真係唔夠膽！」點解唔還余慕蓮心願？小齊話：「初吻好緊要，唔好啦，好神聖。」但係小齊就同徐子珊有咀戲，佢解釋：「係劇情需要，我都未錫過我阿媽個嘴，我有分嘅，朋友、阿媽禮貌嘅方式可以錫面，我都盡量唔錫囡囡個嘴，留番將來畀佢男朋友。」
子珊搶冰冰鏡
低胸打扮嘅徐子珊，搶晒打扮密實嘅范冰冰鏡，子珊話：「今晚有中港台演員，我盡量唔可以輸，冰冰係內地大明星，佢都好靚好受歡迎，我望塵莫及。」
有消息指范冰冰日前喺內地出席華表獎時，因為爭壓軸行紅地毯，引起同場嘅章子怡不滿，冰冰話：「那天我有工作安排遲入場，才變成行壓軸，並不是大會決定。我和章子怡是好朋友，我們內地藝人很團結。」
