鬼節過咗幾日，大吉利是講句，時運低嘅你可能已經揩過嘢撞過靈界朋友，所以今日司徒師傅就就教教大家點善後，梗係啦！撞過一次仲唔夠咩？
文：嘴嚼爺
首先，大家如果覺得有嘢坐順風車嘅時候，記得先保持鎮定，因為呢啲靈界朋友多數都冇惡意，佢哋亦唔需要搭順風車，上你車多數係貪玩。不過被呢啲朋友坐過架車，都唔可以唔理就算數，因為咁樣架車會積聚陰氣，下次情況可能更壞更恐怖。
司徒師傅話假使揸車時遇到陰靈，有拜開神嘅人應該連人帶車駛去廟宇拜神，拜神時記得講清楚姓名、住址、車牌號碼同車身顏色，咁先夠誠心誠意有交帶。
最後，師傅話七月揸車，最好唔好經過蕉林竹林，如果一定要經過，就應該慢慢過，有咩事都冇咁危險。禁忌方面就係唔好放元寶蠟燭香喺車度，如果唔係一定會有朋友跟你開餐，仲有，過隧道千祈唔好望個隧道頂呀，點解？你今晚望吓咪知囉！
司徒法正師傅
有線娛樂台《怪談》客席主持，司徒法正師傅自幼修習六壬淳風道，集玄學道術之大成，被澳門各大賭廳請為御用法師。葡京、回力、皇庭等，皆有其佈下之天羅地網招財風水格局。