八月二十日本欄講「麥嘉華靈過鬼」，一位讀者「好奇人」來電郵問：「興登堡凶兆必須滿足五個條件，條件為何？」呢五個條件講出嚟，比較複雜，請「好奇人」讀者上網，「維基百科」有詳細介紹。上次講嘅網站www.safehaven.com亦有。
中六升中七學生Ｙ聽左丁山講，去年開始學睇《經濟學人》社論，睇得多，作文果然有進步，喺學期考試UE科（英文應用）攞咗個Ａ㖭。最近因為次按風暴，英文報紙出現唔少財經名詞、動詞，學生Ｙ識得啲字，但唔識點解，其實何止學生Ｙ吖，一般讀者睇完都要諗清楚先至會明白，譬如：
（一）講到按揭危機，有neutronbombeffect（中子彈效果），幾嚇人。據講中子彈爆炸後，敵人死晒，但樓房裝甲車會冇事（科學上，未必係咁），以此引伸，銀行大規模收樓（foreclosure），趕住客/業主搬走，人去樓空，次按風暴引爆收樓潮，產生中子彈效果。
（二）美國財長保爾森講re-pricingofrisk，每種風險皆有代價，次按風暴之前，大家嘅「風險胃口」（riskappetite）好大，買垃圾債券都唔講究riskspread（風險差價）。現時唔同咯，投資者變成riskaverse（抗拒風險），對不同風險嘅資產，重新計過價格，要求高風險高回報，此之謂re-pricingofrisk。
（三）基金經理講re-balancingofportfolio，即係話將投資組合再調整，沽出一啲高風險資產，買入多啲安全性高嘅資產（例如短期國庫票據）。故此一啲股票價格急跌，國庫票據（T-bills），價格急升，令國庫票據孳息率急跌。
（四）德國大銀行WestLB（好似係第四大德國銀行）行政總裁畀記者問及同業拆放嘅最新情況，佢話德國銀行wereinanotuncriticalsituation，用上doublenegative，正是負負得正，呢位總裁其實係講：「德國銀行處境嚴峻。」，弦外之音係國際級銀行唔多肯借錢畀德資銀行。