噢~~蘇斯克查掛靴喇！呢位唔知經過多少個紅魔朝代嘅功臣，終於頂唔順成日纏繞佢嘅膝傷，喺噚日宣佈收山。蘇斯克查突然季初掛靴，相信令好多球迷、仲有領隊費Sir都打咗個突；好彩沙夏同路爾斯安達臣已復操，如果唔係紅魔前線真大鑊。
數吓數吓，今年已經係蘇斯克查效力曼聯嘅第11個球季，呢位挪威「娃娃臉殺手」為紅魔出戰過366場入126球，又攞過6次聯賽同兩次足總盃冠軍。最重要嘅梗係99年歐聯決賽，蘇斯克查喺補時階段射入反超前拜仁2:1嘅入球，相信好多紅魔躉諗番起當年，都覺得非常感慨。𠵱家蘇斯克查以34歲之齡掛靴，咪當功成身退囉，冇嘢㗎，起碼你嘅威水史長留球迷心中吖！
轉任紅魔親善大使
睇番曼聯「3冠王」時代，家陣得番史高斯、傑斯同加利尼維利仲喺度，時間真係唔等人。之但係，蘇斯克查掛靴後都唔係嘆世界冇嘢撈㗎，以我求大俠所知，佢不嬲都教緊班紅魔𡃁仔踢波，我喺電視都睇佢示範唔少個人技術。
聽講費Sir上年已經安排咗佢做曼聯嘅親善大使，等佢可以周遊列國宣傳吓，感受一吓「一日紅魔，一世紅魔」嘅使命，費Sir認真唔話得。好啦，我求大俠都要學吓外國報章大題「Bye,Bye,Ole！」咁，同蘇斯克查講聲再見先！