娛樂圈近日喜事重重，現年35歲的湯寶如上周六為未婚夫陳德民（Sam）剖腹誕下重7磅6安士的兒子，但她已急不及待在下月復出登台，故要爭取時間學湊仔。雖然BB的媽咪是歌手，爹哋擅於賽車，但湯記已表明不准兒子長大繼承父母衣鉢，希望他做個成功專業人士。
湯寶如上周六為家族經營賽車生意的未婚夫陳德民（Sam）在養和醫院剖腹誕下重7磅6安士男嬰，現已回家休息。醫生原本安排湯記在剛過去的周日生BB，但那天正是農曆七月十四，俗稱鬼節，所以湯記要求提早一天做媽咪。
餵奶雞手鴨腳
湯記一索得男，全家上下都非常興奮，雖然聘請了陪月員協助照顧BB，但她仍親力親為。湯記昨日接受電話訪問說：「接咗BB返屋企，可能我仲未學識湊佢，成日都雞手鴨腳，親友幫手餵BB時，佢好乖好肯飲奶，但一輪到我餵，佢就好唔畀面，唔肯飲，可能我嘅手勢令到佢唔舒服。」
當了媽咪，湯記覺得自己責任大了很多，她說：「我要將所有最好嘅都畀晒BB，我幫佢留咗臍帶血，好想餵人奶畀佢，可惜自己唔係幾舒服，暫時做唔到。」
問到湯記為金叵羅改了甚麼名字？她說：「中文名會搵人改，英文名我好想用M字頭，但未有決定。」她決定稍後會為BB擺雙滿月酒，那可會順道辦理結婚手續？她說：「結婚嘅嘢遲啲搞都冇問題，我𠵱家乜都要以BB行先。」對寶貝仔將來有甚麼期望？她說：「我只希望佢可以健康成長，最好唔好入娛樂圈，就算學爸爸賽車都唔准，太危險啦，我最想佢可以做個專業人士。」
Nelson送BB車
湯記低調進醫院生BB，竟然連老友形象設計師張學潤（Nelson）都被蒙在鼓裏，他昨日在電話中說：「我有啲嬲佢咁神秘，因為我一早諗住要去醫院陪佢，分享佢嘅喜悅。」不過，Nelson還是很錫湯記，他說：「我遲啲會去探佢同BB，睇吓佢有乜嘢嬰兒用品需要，我想送架BB車畀佢。」
湯記懷孕後，一直有跟已為人母的黎瑞恩和劉小慧交流湊仔心得，她說：「小慧叫我乜都唔好咁緊張，而小恩子就話要安排小朋友學多啲嘢，而我就會取中庸之道。」
採訪：比華利
