現年23歲的亞姐參賽佳麗「毛腿黛林」戴莎莎，未入圍已負面新聞不絕，先自稱與國家主席胡錦濤兒子胡海峰是密友關係，繼而被揭虛報學歷和年齡，大話連篇。儼然風頭躉的她，原來去年在提名人楊曼莉和黃夏蕙陪同下，曾往深圳一私人會所消遣，其間獲楊曼莉介紹認識兩名商人，戴莎莎即黐實對方豪情暢飲，交際技巧果然有一手。
亞姐參賽佳麗「毛腿黛林」戴莎莎，未入圍已憑多宗負面新聞火速上位，近日她更被指在深圳娛樂場所陪酒。來自北京的戴莎莎獲好友楊曼莉提名參選亞姐，為了方便來港參加有關活動，目前住在楊曼莉位於深圳布吉的寓所。連日操勞，戴莎莎昨日更患上感冒病倒，需要到深圳一間醫院吊鹽水，然後再到附近恤髮。
便秘谷到爆
吊完鹽水一身鬆晒
對於戴莎莎被指在娛樂場所陪酒，楊曼莉昨日說：「因為戴莎莎係11月4日生日，而黃夏蕙就喺11月5日生日，舊年我兩個姓張嘅生意朋友喺深圳擁有一個私人山莊，於是就幫佢哋搞生日會，我嘅朋友佢哋50幾歲結晒婚，一直做音響同遊艇生意。當時戴莎莎嘅媽咪都坐喺個女身邊，不過有雜誌就寫到佢當陪酒女郎，好無辜。」
楊曼莉指戴莎莎暫時未看過有關報道，不過聽聞後已很不開心，她說：「佢話好想嫁個好老公，𠵱家俾人咁寫，佢好擔心嫁唔出，寧願唔做娛樂圈喎。」
楊曼莉指兩名張姓兄弟商人與成龍稔熟，她說：「佢哋嘅生意好大，我都介紹過佢哋畀成龍識，於是成龍又送咗兩架車畀佢哋。張生兩兄弟好疏爽，佢哋知道藍潔瑛唔掂，每個月都畀幾千蚊佢用。」問楊曼莉可有乘機把戴莎莎也介紹給成龍認識？她說：「咁又冇喎。」
提到戴莎莎被指自編自導與胡海峰的戀情，楊曼莉力撐說：「係亞視《第一手真相》太誇大，佢只係講話朋友關係啫，我𠵱家搵咗人同胡海峰解釋，佢了解戴莎莎，最多都係嬲香港媒體。」
問到戴莎莎的病情，楊曼莉說：「佢成日話好肚痛，又感冒又發燒，又話大便唔到，便秘咗幾日谷住好唔舒服，醫生咪要佢每日去醫院門診部門吊鹽水，佢嘅家人喺晒北京，我咪要負責照顧佢。」楊曼莉又大讚戴莎莎為人清純，她說：「佢份人好乖，平時唔鍾意出街，只係留喺屋企念佛經。」
至於黃夏蕙為了替契女戴莎莎澄清陪酒傳聞，昨日特地向本報提供了生日派對當天的照片，表示戴莎莎與兩名張姓商人舉杯時，她和楊曼莉都在場。
黃夏蕙說：「呢批相係3年前影嘅，佢哋幫我喺自己旗下深圳機場附近嘅鄉村俱樂部搞生日派對，當時戴莎莎同楊曼莉都有份去，佢哋兩個知道我同戴莎莎差一日生日，佢仲買咗兩個蛋糕賀我哋，完全唔係嗰回事。」
由黃夏蕙提供的生日會舉行時間與楊曼莉所言有出入，記者其後再向楊曼莉求證時，她指是黃夏蕙記憶錯誤。
亞視劃界線
「佢唔可以代表亞姐」
此外，就戴莎莎被指在深圳陪酒一事，亞視公關部發言人昨日在電話中說：「佢上次擅自作自我宣傳，亞視已經對佢作出口頭警告，其實我哋要澄清亞視仲未決定戴莎莎入圍，只係一名報名想參加亞姐嘅女仔，佢唔可以代表亞姐身份，所以亞視現階段係唔會評論佢嘅私人生活，佢喺報名時都要填一份守則，佢要尊重同保持大會嘅形象，否則我哋會保留追究權利。」
採訪、攝影：娛樂突發組、葉雪
深圳直擊
吊鹽水通便 恤靚髮散心
迷信小八卦：腳毛是福 一脫即喊
「毛腿黛林」戴莎莎早前面試亞姐時，因沒剃腳毛而成為拍攝焦點，她曾表示絕對不會脫掉腳毛，楊曼莉昨日卻說：「曾有高人讚戴莎莎嘅毛係福毛，最好唔好脫，不過佢要參加選美，一定要脫咗佢，為咗咁佢仲喊過㖭。」
記者昨日致電區仲德相士了解關於「福毛」的問題，他說：「毛髮係有生命嘅，象徵住生機，每條毛嘅位置都代表住運勢，掹咗會影響運勢。不過對於女性嚟講，腳毛太長會變得血氣旺盛，陽氣過重，性格會變得粗豪，加上礙於美觀問題，應該適宜剃毛，而唔係掹。」
