曾經鬼鬼崇崇，見到警察叔叔要掉頭走，「以前喺停車場拉吓拉吓個手掣㗎咋。」有香港飄移王之稱嘅吳海堂話𠵱家光明正大得多：「錢嘉樂簡直係香港飄移界嘅恩人啦！」原來嘉樂召集咗海堂等人組成飄移戰隊，專用甩尾技術拍戲搵錢，專業到猛彈勁賣座嘅港產電影《頭文字D》：「其實套戲好多失手同穿崩，唔係佢哋唔勁，而係以咁嘅Budget同人才應可更好，以打波比喻，即係撻Q入波雖然都有分，但入得唔靚囉！」
文：嘴嚼爺 攝影：陳偉強
話甩就甩，拍照地方和一個籃球場差不多，錢嘉樂問一句：「打到8字吓嘛？」海堂答一句：「梗得。」隨即響聲震天、甩到出煙，型！
阿帆
年齡：29歲
座駕：日產S14
甩尾年資：8年
平日身份：燈飾設計師
絕技：攞位攞到盡
阿帆絕技係用盡有限地方做出甩尾動作，因為Friend介紹加入錢家班，橫街窄巷玩甩尾最啱晒佢。
阿標
年齡：29歲
座駕：日產S14
甩尾年資：8年
平日身份：時裝設計師
絕技：甩尾泊車
阿標最希望試吓左邊擺法拉利、右邊有林寶，再甩尾泊入中間就型喇，不過最緊要揩花唔使賠。
Gray
年齡：31歲
座駕：日產S15
甩尾年資：3年
平日身份：食品批發
絕技：定點飄移
Gray話加入錢家班純粹為咗攞正牌練甩尾，因為飛雞公認最好甩，所以隊員全部都係揸呢個系列。
阿偉
年齡：33歲
座駕：咪呢架貨Van囉
甩尾年資：十幾年
平日身份：咪安全支援囉
絕技：定點飄移
拍戲或出騷，阿偉負責支援做安全車，或運載器材。佢外形加埋部Van，令我諗起《鐵甲萬能俠》大鐵牛。
TeamLeader
海堂
年齡：30歲
座駕：日產Fairlady350Z
甩尾年資：9年
平日身份：汽車維修中心老細
絕技：全能
甩尾王戰車
拍戲講戲，但喺車迷心目中，海堂始終係車手，講番車。揸開日產Fairlady350Z嘅海堂最新玩具係呢架由S14改出嚟嘅KL14戰車，拍戲裝備、甩尾功能通通改到盡。
呢架KL14PickUp原身係嘉樂甩尾練習車S14，但為咗幫助錢家班拍攝賽車特技場面而大量改裝。當中包括採用CoolMAX合金大容積水箱，令Turbo引擎長期保持低波高轉，做出原地甩尾動作。另外ML絞牙避震則令車身更貼地穩定，加上WorkEmotionCRKai系列及Kumho胎軨配搭，令飄移戰隊眾人都可以更安全輕易做出各式特技動作。
飄移恩人錢嘉樂
錢嘉樂曾經講過：「唔會話佢哋跟我撈，大家合作啫。」
所以「錢家班」呢個咁有代表性嘅牌頭，係海堂等人改嘅：「錢嘉樂簡直係香港飄移界嘅恩人，無論你玩咩玩得幾叻，總之人哋聽見你玩車，就覺得你係死飛仔。三個月前喺龍鼓灘，我哋打晒友情牌請嚟日本甩尾高手日比野哲也表演，點知警察嚟清場，真係令人好失望。」
「而錢嘉樂係藝人兼形象健康，可以將甩尾特技健康及普及化。我記得第一次跟佢拍戲，有警察到場巡視，嗰次係我第一次喺警察面前甩尾。」
甩尾更係一種專業表演：「以前去上海澳門賽車，一味夠快就得。做特技要兼顧觀眾感受，有技術之餘仲要有官能刺激畀大家，原來飄移可以當職業。𠵱家警察見到我哋玩車都會問兩句，但知道係做嘢就唔再話鈎車驗車。我哋都好有規矩，唔想人哋覺得我哋係飛仔，車身啲貼紙都唔係亂貼㗎，真係我哋嘅Sponsor。」
錢家班參與過唔少大製作，如《旺角黑夜》、《寶貝計劃》、《門徒》等，嚟緊仲有《兄弟》同《鐵三角》，證明有食力。
頭文字D＝撻Q入波
車手變甩尾王再變演員，曾經客串過《門徒》扮探員，同將會喺四虎拍嘅《兄弟》中扮殺手，錢家班把海堂帶到電影世界，「甩尾好玩過賽車，拍戲做特技呢個更加係新世界，有趣得多！」
既然已經係演員，梗係問問最欣賞邊套戲嘅飛車特技，出乎意料係飛車戲唔多嘅《鐵金剛》，「呢個系列嘅飛車一向做得好好，最新嗰套《皇家賭場》有幕喺山路嘅炒車戲，觀眾睇可能覺得好易，但其實凌空炒起，轉咗7、8個圈落地，已經係一個紀錄。」睇得深入，連我哋凡人睇到嘩嘩聲嘅《頭文字D》，都滿足唔到佢：「專業角度睇其實只算一般嘢，好多破綻同失手嘅鏡頭都照出。以咁嘅Budget同人才，應該唔只做到咁，即係好似踢波咁，曼聯贏一球都唔算贏啦，仲要係撻Q射入，球迷都唔會收貨囉。」咦，咁朗尼斷咗腳咪甩唔到尾？
甩尾王KL14 改到變農夫車
