身為有線娛樂台《怪談》主持嘅余思敏，雖然冇揸車，不過鬼古應該聽唔少。03年7月，一架巴士發生車禍，由汀九橋墮下，21人死亡。自此後汀九橋附近就不時傳出靈異事件。思敏就話有位攝影師同事，有晚凌晨兩、三點收工，搭小巴返屋企經過汀九橋，就喺小巴行到一半到當年意外發生地點時，佢見到有一班人喺橋邊欄杆位，有啲企喺度，有啲就坐喺欄杆，好似等車一樣。開頭嗰位同事只係奇怪，點解咁夜仲有咁多人喺度等車？後尾諗番先醒起條橋淨係俾車行，嗰個位冇理由會有人喎，仲要多人㖭。諗吓諗吓，嗰班人好似冇顏色，全部都灰灰白白！
瞓正妹妹隔籬
講完汀九鬼古，思敏未夠喉再講親身經歷，唔關車事，但好鬼恐怖。話說有一次思敏同屋企人去布吉旅行，佢就同個妹同房孖鋪，點知瞓到半夜三更，個妹突然扎醒大嗌一聲，思敏問佢咩事，佢只係話：「冇，發噩夢，我可唔可以拖住你瞓？」之後兩姊妹就拖住瞓啦，瞓瞓吓，佢個妹失驚無神成個彈起，仲猛話要過阿媽房瞓，最後兩個就一齊去咗媽咪房瞓。
第二朝思敏問番妹妹噚晚到底咩事，阿妹就話：「噚晚瞓瞓吓我聽見有人喺耳邊話：『我喺你哋中間呀……』所以我咪拖住你唔俾我哋中間有空位囉，點知隔咗一陣，又再聽到多咗把聲話：『唔好壓住我呀……』！」嘩，聽到都毛管戙！