現時PS3全球銷量突破400萬部，雖仍未追到Wii同XB360，但喺高清影碟界所向披靡，BD影碟佔65%市場，比對手HDDVD多一倍。正當對手勢弱之際，荷李活八大龍頭之一嘅派拉蒙卻孤注一擲，宣佈單獨支持HDDVD，將於聖誕推出嘅《變形金剛》及《史力加3》只會出HDDVD版，搞到「藍營機民」喺網上呼天搶地，掀起一陣小風波！
記者：徐影龍、陳國輝
派拉蒙舉棋不定
兩大高清制式成立之初，派拉蒙本已投陣HDDVD，但眼見Blu-ray走勢凌厲，遂宣佈同時推出BD影碟。到今天卻又再回心轉意獨撐HDDVD，暑假大片《變形金剛》及《史力加3》（夢工場已被派拉蒙收購）通通過檔齋出市場細一半嘅HDDVD，搞到《變》導演MichaelBay喺Blog度發晒脾氣，話罷拍《變形金剛2》（不過2日後反口）！在BD影碟銷售高一倍、硬件大幅拋離HDDVDPlayer底下，此舉令全球摸不着頭腦，更流傳最有錢嘅「唔夠硬」背後出手，以1.5億美元籠絡派拉蒙及夢工場獨撐HDDVD，而且獨佔合約僅18個月，呢單傳聞連《紐約時報》都有報道。
派拉蒙已全線取消預定推出嘅BD影碟，令Amazon等網站掀撻定潮。
史匹堡執導不受影響
姑勿論傳聞是否屬實，但《變》及《史》全球票房超過10億美元，點會為區區億幾而冒險歸邊？筆者大膽推測，能令派拉蒙心動主要有3：HDDVDPlayer將割價傾銷搶市場，流傳摸底價是199美元；另外HD碟製作成本低、毛利亦比BD高；最後一點，派拉蒙佔全球影碟市場不足10%，喺BD陣營冇乜話事權，受不了四大龍頭（尤其SONY）之嘴臉，而HD陣營壓低權利金兼招手歡迎，拍住Viacom同門兄弟環球齊做揸Fit人，畀你都識揀喇。
雖則商人講金唔講心，不過史匹堡卻未有變節，夢工場高層MarvinLevy已證實大導演獨愛Blu-ray，過往執導嘅影片唔會齋出HDDVD，更有不少作品屬BD獨佔！如11月13日推出嘅《第三類接觸》30周年紀念版就只推出BD，08年計劃推出尚有《雷霆救兵》、《侏羅紀公園》、《ET》等經典。
碟舖：HD抵買、BD多字幕
各大碟舖對高清一戰又點睇？旺角德發商場DVDPRO負責人Andy話：「HDDVD技術要求冇咁高，成本低，影碟價錢都賣得平啲啦！」另有兩間碟舖則持相反意見，認為BD始終有中文字幕優勢，適合港人。
碟舖回應
碟迷點揀？
網民回應
《香港討論區》http://www.uwants.com
solomon1013：以𠵱家HDDVD個勢嚟講，咁做即係攬住一齊死。
fd318：我覺得係每個Format都出就最好，等每人都可以睇。
《巴哈姆特》http://www.gamer.com.tw
eydaschen小艾：光靠一家片商就想扭轉弱勢，難度不是普通的高。
盜賊的左擁右抱：很傷心啊!畢竟少一家公司就少一些BD影片可看。
小嘉：HDDVD扭轉情勢機會不大，但派拉蒙倒戈卻可讓他們再玩一陣子。
《HD.club精研事務所》http://www.blog.lmcafe.com
sega2003：推出兩版本應可增銷量，現在卻選擇獨佔HDDVD，實在奇怪。
cd-dvds.net：總覺得這場戰爭最後會打的越來越骯髒。
八大影業鬥籌碼
Blu-ray陣營
哥倫比亞（SONY）、美高梅、二十世紀霍士、廸士尼（博偉）
系列注目作：《蜘蛛俠》、《虎膽龍威》、《變種特攻》、《魔盜王》
中立代表：
華納系列注目作：《哈利波特》、《魔戒》
HDDVD陣營
派拉蒙、夢工場、環球
系列注目作：《職業特工隊》、《史力加》、《叛諜狙擊》
＊註：夢工場出品中不包括史匹堡執導電影。