聽日，我就30歲。
如果大家對數學略懂一二，應該計到孫柏文1977年出世。今日寫呢篇文，我唔會話係代表一代人嘅說話，只係同大家分享自己嘅少少經歷，如果你同我年齡差唔多，希望會有啲共鳴。
96年，卒之搵到間花旗國嘅大學肯收我，就係咁，我喺聽聞香港最風光嘅日子出國留學。大家可能會問：「點解用『聽聞』呢兩個字？」原因係自己根本未試過喺嗰啲日子搵錢，當年聽啲諗過移民嘅長輩話：「點走呀？錢喺香港咁易搵！」對我嚟講，真係一個傳說。細細個聽過兩句「真言」，第一句係「香港地少人多」，如果呢個係上聯，下聯就係「所以炒樓必勝」。對我嚟講，又係一個傳說。樓，我冇份炒。
缺席香港風光日子
我第一次自己落場炒股票，係大學第一年回港放暑假。北京控股（395）我冇抽，不過「一籃子紅籌」輪就有炒。炒到8月中，因為要返學，所以清倉。好彩。
到99、千禧年，我畢業。「錢喺香港咁易搵！」嘅傳說已經完全幻滅。我嗰屆嘅畢業生，好多被特區之亂嚇怕，為咗搵食讀電腦系。雖然佢哋未有師兄LarryPage或BillJoy咁勁，不過每次有人話香港人「不懂科技」，我就會記起我啲到今時今日仲流落異鄉嘅舊同學。除咗讀電腦，我嗰屆叻嘅人、喺花旗國搵到工嘅人，到今日仲係未返。
我當年讀書冇搵工，諗住去搞dotcom，點知未開始，泡沫已經爆破。dotcom，我冇份搞。不過當時23歲一份熱誠，諗住為其他市民提供一個「自由市場」嘅立法會選擇，所以走去參選。結果？有如《南華早報》幾日前話「humiliatingdefeat」。千禧年，盈科數碼動力，我炒過，12蚊上車，18蚊落車。好彩。
曾經雙失炒過賺過
之後幾年特區經濟點，毋須多講。我試過好耐冇工返、冇書讀。我，曾經雙失過。嗰種每日慢慢不斷摧毀自信嘅感受，殘酷。不過，雙失嘅日子，亦係我睇、讀最多嘢嘅日子，為之後做分析員打基礎。得閒就係咁。
今日，就當我為自己嘅廿歲年代畫上句號。不過畫之前，我想向所有我30年嚟整喊過嘅女人道歉，當時我可能愛妳不夠，又或太過愛妳，點都好，IloveyouandIamsorry。聽日，就係我人生新嘅一頁。
金手指網誌： http://phatdat.blogspot.com