今年係中移動（941）上市10周年，無論盈利同上客數字都創咗新高，今個星期一，仲做埋「紅底股」，相信董事長王建宙一定喜上眉梢。
噚日同係祖國四大電訊商嘅中電信（728）公佈業績，講開中電信嘅董事長王曉初，係第二代中移動揸fit人，04年過檔中電信，所以有記者問佢對於中移動家陣有咁嘅成績點睇？中電信要幾時先做到咁嘅成績？
咁樣問，即係話中電信唔知幾時先追到中移動啫！不過，薑係老嘅辣，王總話：「喺中電信嘅工作更具挑戰，因為之前嘅工作太容易，容易令人懶散。𠵱家喺冇移動牌照情況下，佢無時無刻都要諗計，點樣維持收入同利潤可以同步增長，所以相對中移動，中電信要付出嘅努力更大。」學到嘢未。
現職挑戰大
不過，王總後尾補飛話，只係以之前喺中移動嘅工作，同𠵱家喺中電信嘅工作做比較啫。佢仲話中電信係老企業，對於全體員工努力得嚟嘅成績感到非常驕傲；又話喺中電信工作更有幹頭，更具挑戰性，對公司同個人都係一種鍛煉。