淨係睇幅相，你會以為恒生（011）副董事長兼行政總裁柯清輝（右），請咗電盈（008）董事總經理艾維朗（左）返屋企睇電視。錯囉！係就係同電視有關，不過唔係「睇」，而係「炒」。為咗方便散戶炒股，所以恒生同電盈合作，用Now寬頻電視頻道，開咗個號稱全港首個電視炒股交易平台，由今日起，恒生e-Banking客，做埋Now嘅客，就可以喺屋企攞住個遙控炒股。
恒生話，佢哋同電盈合作嘅「電視炒股」服務，暫時都係獨家。問電盈會唔會同其他銀行合作，佢就話要睇吓自己班客仔有冇咁嘅需求。Now攞咗英超聯賽，你話攞住個遙控可以賭埋波，咁就冇敵囉！
梁鑑章攝