雖然華華唔係好清楚「中產」點樣界定，但要知都唔係好難，只要check吓自己係咪稅就交足，福利就永遠攞唔到，仲要次次政府「開刀」你都中伏。以上嘅嘢如果你全中，恭喜你，你99%係中產。
不過，係咪真係值得恭喜呢？
使費少過做菲傭
噚日華華見到花旗環球個人銀行服務首席營運總監及零售業總監盧韋柏，佢話：「中產分分鐘窮過基層！」
唔係老作，有根有據㗎，花旗前排搵城大做咗個有關中產嘅調查，用電話訪問咗五百幾個中產階層，計過每人每月平均大概有兩萬五收入，不過必要開支就成兩萬兩千七，即係剩番兩千三蚊使，分分鐘少過做partime嘅學生哥，慘過菲傭！
究竟呢條數點計出嚟呢？嗱，自己同父母家用要七千七銀、供樓五千三、幫屋企人買保險用二千五、使喺化骨龍身上又兩千五、仲有交通千五、屋企雜費千六，供強積金千六，加加埋埋啱啱好，份人工就係咁七除八扣，每人每個月得番兩千三。
娛樂裝身靠晒佢
中產要置衣裝身、食飯飲嘢、social唱K，就係靠呢兩千三銀。以中產嘅生活質素，開支wine都一千幾百，分分鐘使凸？
女中產仲話希望好命嫁個有錢人，下半世唔使憂；如果係男中產，除咗慳啲使，就真係要靠自己妥善理財，因為明知強積金唔夠養老，政府又冇得靠，仔女更加唔好諗！
聽完個調查，大家係咪好灰？咁就啱嘞，因為花旗話佢哋有個新服務，專門針對中產而設。講咁耐，大家知咩事啦！
[email protected]
