前一排應承咗做台灣高鐵董事，跟手又話因為要返中國闖蕩，怕有利益衝突，簽咗約都反口唔做嘅「着數哥」蘇澤光（圖），噚日又有新職銜。就係代前財爺梁錦松，接手做友邦保險嘅非執行董事。睇怕今次應該冇乜衝突，可以順利到位！華華知道，友邦家吓有兩個非執董，着數哥以外，另一個係鄭維健。
友邦主席謝仕榮話，深信着數哥過往喺政府同埋商界嘅經驗，必定可以喺管理同埋持續發展上，為友邦作出貢獻。咁又係，着數哥大學畢業就入政府打工，78年入商界，縱橫證券、銀行、地產界，連貿發局總裁佢都做過，跟手又喺地鐵同電盈做過高層，當知道國內有發圍機會，就即刻反口唔去台灣做高層，正所謂「識時務者為俊傑」，咁「傑出」嘅人才，梗可以令公司更上一層樓啦……唔信你問李家二少嘞！