舊金山「就業法律聯盟」做咗項調查，發現44%職員話，曾經俾老闆苛待。正因為咁，美國新澤西州、紐約州、佛特蒙州同華盛頓州議會，正考慮立法，幫員工控告嗰啲刻薄老闆。
有網友喺《FreeRepublic討論區》問：「如果成功立法，會有乜嘢影響？」
Integrityrocks話：「我以前個老細好刻薄，令我頂唔順，惟有劈炮唔撈，但我冇諗過告佢。如果真係立法，幫職員控告老闆，我擔心呢條法例會濫用，因為部份工作效率好低嘅懶散員工，可能會屈老闆欺壓佢哋，乘機索償。」
盞益晒啲律師
cake_crumb講：「如果立例幫員工告老闆，只會益晒啲律師，令佢哋有多啲生意。」
身為老闆嘅RC2話：「我間公司好細，日常事務同拍檔都搞得掂，我哋盡量避免聘請員工，費事第日俾人告。」
Graycliff教路：「老闆請人時，可以要求對方簽署免責聲明，講明員工將來唔可以告老細至請。」
美國勞聯/產聯，正舉辦07年度「我的衰老闆」網上選舉，畀參賽者盡訴老闆點樣刻薄，然後由網民投票，選出最「衰」嘅老闆。
佛羅里達州立大學商業學教授韋恩．霍克沃特嘅調查顯示，認為自己俾老闆欺壓嘅員工，患抑鬱病、偏頭痛、睡眠障礙嘅機會，大過一般職員。