關淑怡不嬲性情飄忽，佢做嘅嘢，大家往往估佢唔到。日前關淑怡到中環雪廠街嘅廚魔餐廳食fusion菜，但搞到非常輪盡，食完飯要即刻坐車㩒錢埋單，確係狼狽。
嗰晚接近凌晨12點，着T恤、白色長闊褲嘅關淑怡喺廚魔嘆完晚飯後，唔知係咪帶唔夠現金，要即刻坐保母車去擺花街㩒錢埋單，不過佢都算當黑，兩部提款機都停止服務，一面無奈嘅關淑怡惟有再坐車，轉去置地廣場附近嘅提款機㩒錢。
不少途人認出
雖然時近半夜，但一街都係人，關淑怡現身鬧市，梗係俾大批途人認出，不時對佢眼望望，但佢一於少理，嗱嗱聲㩒錢後，就邊行邊將現金放入長銀包，奇就奇在關淑怡一直眼尾唔望人，但都可以運用翩然嘅步法，避開晒所有路人，然後上車返食肆，當車駛到廚魔門外時，一名着黑衫黑褲嘅食肆職員已經攞住張單，企正門口恭候，而關淑怡都冇落車，喺車邊畀錢埋單後就馬上鬆人。
關淑怡所幫襯嘅廚魔，比較受外籍食客歡迎，食物方面以中、西fusion菜為主，例如有榴槤炒飯同臘味飯雪糕等等，個性獨特嘅關淑怡，連口味都寧舍唔同嘅。
