商台前晚喺尖沙嘴舉行48周年台慶晚宴，出席嘅一眾DJ被要求着上50年代嘅服裝做dresscode。小儀早前曾分別跟DJLeo同Donald傳過緋聞，森美前晚見到拍檔跟兩位緋聞男友同場時，就堅拒同小儀合照，仲越叫越走。結果三個男人加埋針對小儀嚟玩。Donald帶頭話：「𠵱家咁多人，一身鬆晒。」問佢係咪嫌棄小儀，森美就搭嗲話：「佢索過頭，要唔落！」小儀雖然反駁森美話：「冇人侵你玩」，但Donald一於繼續針對小儀講：「你唔好擰過嚟，你個樣好醜樣呀！」森美仲踢爆蘇民峰話如果小儀今年嫁唔出，就要等多10年，仲向小儀推介鑽石王老五顏福偉，小儀聞言話：「好呀，我鍾意打羽毛球！」
娶老婆最大成就
此外，加入商台已有20年時間的林海峰，問佢商台會唔會頒發老人金牌，佢笑話：「吓？我經理人就係金牌。」佢續話呢20年見證好多人事變動，問佢喺20年最大成就係咪搵到個老婆，佢笑話：「既然起咗個咁嘅題，咁係搵到個車位畀我去泊。」
商業電台助理總經理甘菁菁就話下月12日會舉行一個名為《Nokia愛樂享樂903飛馳中音樂會》，邀得李克勤、關淑怡、張敬軒同謝安琪演出，而呢個騷亦係謝安琪產後復出嘅頭炮。
