中國擁有外滙儲備太多，揸住唔少美國國庫債券，不斷想辦法「排洪」，成立國家外滙投資公司，買入百仕達股票，透過進出口銀行入股巴克萊，呢兩大投資，相信係頭盤啫，主菜仲未出場。八月二十日收市後，大家知道中國銀行天津支行可以接受內地股民開戶口，寄錢到中銀國際證券開股票戶口，買賣港股，但所有錢唔准在香港提取或轉賬，必須連同賺到嘅錢（假設賺錢嘅話）滙返天津，股民在天津提款。換句話講，內地嘅外滙資金管制仍然有效，炒股錢不能離開境。
究竟有幾多內地散戶用此方法買賣港股尚未可知。目前一切靠估，以目前A股、H股市場情況推斷，內地散戶冇理由唔炒A股而轉炒H股。理由有二：（一）A股升得快，回報率高；（二）H股、紅籌股、本地股嘅股價受世界市場動盪影響，隨時可升可跌，波幅好大，蝕本可能性，無日不在。反之，最近美歐日與亞洲股市大跌之時，內地A股閂埋門嚟玩，似與世界絕緣，有大升，冇大跌，短期風險細好多。
不過未必樣樣事都可以用經濟理性嚟評估。有辦法調動數以百萬計人民幣來港炒股嘅人士，行內人話已經嚟晒咁滯，去天津開戶口調錢嚟嘅人，肯定係散戶，一舉一動，盡在中銀（即係政府）掌握之中，大款大戶未必肯制，𠵱家只係希望散戶人多勢眾，十萬個戶口，每戶口有十萬元人民幣，就有一百億元。大行估會有八千五百億元，唔會咁快啩！
真係有咁多錢嘅話，香港股民就處於下風捱打咯，本來散戶經常處於下風，將來只有一兩間中資知道有幾多錢嚟，幾時嚟，已是佢哋在黑，我哋在光，人哋做咗嘢先，我哋仍然烏垂垂，點夠人哋揮呀。若話資訊不對稱，莫此為甚。香港啲分析師分析多多都冇用，人哋早兩個鐘頭知道消息，已經贏晒！短炒從來不易賺錢，有咗天津條水之後，短炒更加不宜，奉勸大家以後買H股，唔大唔好買，買咗就要鎖埋一段時間，對短線波動冇眼睇。