旅遊L約食午飯，傾起各地美食，特別多嘢講。旅遊L曾在台北、新加坡、耶加達、馬尼拉做事，今年鳥倦知還，返嚟香港，於是走去鏞記試吓闊別多年嘅燒鵝。旅遊L話佢喺新加坡食法國菜，曼谷食意大利菜，正斗過正斗，但返到嚟香港，發覺正宗法國菜餐廳好似少咗，代之而興嘅係「混合」（fusion）菜。左丁山話：「食法國餐，好似太多規範，時間又長，唔啱今日香港人嗰種猴急法。」旅遊L話：「咁又係嘅，我上次喺新加坡食一餐好靚嘅法國菜，中午十二點半開始，到三點先至嚟甜品，返到公司，將近三點半，啲同事眼望望，我雖然係佢哋波士，亦覺得唔好意思。」佢咁講法，左丁山記起有一年在馬尼拉與客戶在馬卡提一間著名餐廳食晏，食到三點鐘未有主菜嚟，搵部長問，部長話：「你哋咁好傾，我哋唔敢打擾。」唉吔，佢哋係西班牙作風，左丁山係香港式效率，大家直情有文化衝突，佢哋暗笑香港人唔識享受。
旅遊L緬懷台北以前有好多大江南北嘅菜館，但隨着老一輩廚師（跟蔣介石過海嗰一批）年華老去追隨蔣介石之後，乏人繼承，老牌飯店不斷執笠，選擇漸少，例如台北湖南菜就失去昔日光輝。左丁山好耐冇去台灣，唔敢搭嘴，只記得以前有朋友駐台北，喜吃麻辣，鍾意一間「齡記」，一間「大麻子」，某年，公司啲內部稽核隊伍到台北查數，一位稽核員（internalauditor）話鍾意食辣，於是朋友心生一計，帶成隊人去食麻辣，辣到班人嘩嘩叫，猛話正正正。點知到咗第二朝，全部人離唔開酒店房間，因為個個肚屙，屙足兩日，搞到唔夠時間詳細查數，個報告當然係咁意啦。
旅遊L聽咗大笑，佢話：「唔係真正慣食辣之人突然食好辣食物，個胃會反轉咁滯，食完一定肚屙，百試百靈。出外公幹，最好就住就住，唔好食咁辣。」此乃經驗之言，出差碰上肚瀉，尷尬之外，最慘交唔到差，二十年前左丁山到新加坡，食完海南雞飯，屙咗兩日，一個客都見唔到，返香港畀老闆省到失魂！