「可以笑的話，不會哭……」王傑的《誰明浪子心》，幾乎逢人識唱。一生傳奇的王傑早年又窮困又辛酸，難怪演繹的悲情歌特別滄桑激昂。入行前，他潦倒飄泊，最窮的時候，他得5元身家，只能帶着當時兩歲半的小女兒吃齋麵、把滷水蛋拆半果腹，到他走紅，為賺錢卻做了唱歌機器，結果捱出厭食症。前塵往事，甜的吃，苦的也吃，正是這位浪子的人生。
撰文：朱倬誼
攝影：陳慧安
場地：MindenPlaceRestaurant&bar
21年前，台北的冬天。那天很冷，任職計程車司機的王傑帶着他兩歲半的女兒，光顧路邊攤，他摸着口袋裏僅得的20元台幣，點了兩碗陽春麵和一顆滷水蛋，女兒用筷子篤着半顆蛋放進爸爸的碗內，「爸爸，我同你一人一半。」
王傑聽罷鼻子一酸，眼眶紅了。貧窮和照顧女兒的使命，是他發奮和掙扎求存的刺激劑，結果當年他就憑着獨特慘情的唱腔，演繹《一場遊戲一場夢》（即《幾分傷心幾分痴》國語版）後一炮而紅。
與囡囡住板間房
人生閱歷比黃頁還要豐富的王傑，今天驀然回首，不無感慨，他說：「我一生之中，有兩件事好感動，除咗陽春麵之外，我唱歌後，第一筆賺嘅錢係7,000幾蚊港紙，當時我開心到發咗癲！拎住啲錢由台北嘅基隆路跑去八德路屋企，嗰時我同個女住喺板間房，佢先得3、4歲，我帶個女去紅屋食牛扒，點知一睇餐牌，成200幾蚊港紙一塊扒，於是打消念頭，帶佢去孫東寶牛扒快餐店食鐵板牛扒，20幾蚊港紙一份，嗌咗兩份，食到不亦樂乎，嗰時食牛扒對我哋係好大負擔，所以我對住個女承諾：『爸爸一定會畀你更好嘅！』好彩跟住就搵到好多錢啦。」
吃的故事令王傑一生感動，說到最興奮的，他毋忘處男碟《一場遊戲一場夢》首天推出時，帶給他近乎停止呼吸的刺激。
王傑笑說：「嗰日有位台灣DJ羅小雲，喺電台公佈頭20唱片銷量排行榜，當時我坐喺的士度收聽節目，但一直都聽唔到有我，到即將播第一名時，我心都淡咗，點知我突然聽到一段熟悉嘅鼓聲前奏，心臟跳到由隻眼凸出嚟，呼吸近乎停止，第一位係《一場遊戲一場夢》呀！嘩，我係咁尖叫，開心到箍住前面位司機伯伯，阿伯以為我搶劫定神經病，喺延吉街趕咗我落車，錢都冇收到，但我依然一路行一路笑，對眼仲係濕潤，諗番都覺得好笑。」
拚命賺錢捱出病
窮爸爸王傑紅了，於是不停出碟賺錢，搖身成為富爸爸，但有錢同樣帶來問題，他說：「嗰時都10幾年前，我患嘅厭食症好嚴重，得番80幾磅，牛仔褲都要着幾條，有次我做電台節目後暈咗，助理送我去醫院，醫生同我講咗一句說話：『名利同錢固然重要，但好身體更加重要，唔好唔記得，你仲有個女要照顧㗎。』當時我一年出4張碟，別人眼中嘅王傑只係掛住賺錢，事實當年我係，所以佢講完呢句說話，我真係好感觸。」
故未幾王傑結婚引退，只可惜他第二度婚姻失敗，始終未能在感情上畫上圓滿句號。
漁夫與海
44歲的王傑，人生大起大落，就讓他剖白自己在歌唱事業上的過去、現在、未來：
過去
「我唱嘅歌曲，係同我嘅經歷、性格有關，當年出第一張唱片，大家有好反應，講真係運氣好，嗰時我算係第一個咁唱歌（悲情唱腔）嘅人，因為我本身唱歌好肉緊，好真情投入，通常自己揀嘅歌，都係將自己嘅感覺同意境放喺歌裏面。」
現在
「有好多事情，今時今日唔可以同當日比較，𠵱家唱片咁多限制，大家覺得呢幾年我嘅歌退步咗，事實我都承認，因為歌已經唔係一個人做，同以前差別大，加上香港嘅環境比較快餐式，自己都有少少困擾，亦都覺得對唔住所有傑迷。」
未來
「我仲有年幾就同英皇合約滿，惟有冇合約後，我會出番一張真正屬於王傑嘅碟，但我並冇怪責呢間公司，只不過每個人對音樂嘅睇法唔同，到我出完呢隻碟，我會喺地平線上消失，去一個冇人識嘅地方，對住個海，做個漁夫，過我嚮往嘅生活。」
