《朱咪咪玩嘢扮嘢演唱會》在文化中心音樂廳舉行，宣傳單張兒戲到爆，只有朱咪咪、黑妹和處男下海的黎耀祥3個大名、小肖像和鳴謝清單，但2千座位開售兩星期即爆，廣告見報時已經冇飛賣!朱咪咪這位搞笑師奶歌后，在記者發現她其實是香港最經典Cult之女王前，原來佢嘅粉絲已用了超過20年的行動，證明對她的熱愛，就連散場時絕不要求安歌竟都是默契。不愧為第一個簽約唱廣東歌、毋須爭寵便是名副其實的華納一姐。
記者：馮敏兒
攝影：梁細權、馮敏兒
羅記、梅姐折返人間
演唱會請羅記和梅姐重臨人間，扮嘢演唱，歌聲、小動作似模似樣，不但師奶、中年男人，以至老人家都是朱咪咪和黑妹的超級粉絲，但別的偶像有歌迷會，她們個個卻獨來獨往。「我真係唱得，我哋扮嘢玩嘢，但唱的時候，還是正正經經地唱，他們的確來聽歌！我近來都多了一班後生仔捧場客，連中文大學嘅學生都請我去，因為我親民囉！」咪咪姐生活從來不扮嘢，連妝都唔化，有次她去登台，老闆來接機見到她戴眼鏡成個老師Look，非常失望，直至見到她登台才變成另外一個人。
隔夜避孕袋千祈咪用！
是晚係朱咪咪首次扮甄妮，胸前一對水造大波，出場時萬分風騷，誰知才與「羅記」對唱不了半句，「咦！乜凉凉哋？穿咗喇！我內膽全部濕晒，連對鞋都係水……」全場笑聲震天，事後仲喺後台再爆金句：「你哋真係要記住個教訓，避孕袋，隔夜千祈咪用，我對波係噚晚用避孕套整嘅！」難怪甄妮金曲《命運》咪咪姐一開喉嚨唱「命運」兩個字，份外傳神！
騎呢廣告天后
「國家要開放，𠵱家連睇牙都要開放！」咪咪姐的牙醫廣告，不但搶了很多香港牙醫嘅飯碗，佢嘅朋友都投訴：「想避開你都避唔到，轉個台還是朱咪咪！」她的騎呢廣告超級硬銷，低俗低B出晒火位，但印象猶新的還是「三生牌鹿茸大補酒，係男人強身嘅妙品。」咪咪姐無疑是香港最Cult廣告天后。說到處女作，連她自己都搞唔清楚，只記得92年演了周星馳的《審死官》（飾奶媽），還有《妖怪都市》、《不文騷》、《逃學威龍3之龍過雞年》、《唐伯虎點秋香》……95年後香港電影轉入低潮，她轉戰電視，十多年來拍了20多輯電視劇，演過各式諧角，最勁一次是令黑道中人聞風喪膽的《皆大歡喜》大姐大，而《陀槍師姐》中她的深水埗茶餐廳老闆娘形象「二妹姐」，至今還在星馬和大陸重播又重播，「條水仲食到𠵱家！」
一首獨唱的歌
記者問咪咪姐是演員還是歌星，她堅定地認為是最動聽的那一種。「唱歌我會給自己80分！我在台上一向自信，就算失手，都會說：『咩呀！唔錯得呀！』唔會覺得瘀，偏偏觀眾就最愛看我這樣，我每次出場，觀眾都會一陣騷動，我好滿足！我從未刻意搞笑，只是無心插柳。」偶像派會計較要唱自己的歌，而朱咪咪卻總唱別人的歌，「我自己只有一首歌，是90年曲詞人韋然為我寫的《今天的我》。」她說來聽不出半點遺憾。
神話式Cult女王生涯
「在短短一年裏，我做了別人一生夢寐以求的所有事，上紅館、拍電影、簽約電視、做生意……」遺憾真的如何說得上？最估你唔到的一頁，是79年與香港華納唱片公司簽約，成旗下首個唱廣東歌的女歌手，是名副其實的「華納一姐」！ 馬來西亞怡保出生的窮家女孩，10歲移居新加坡，13歲隨胞姐到酒廊賣唱搵食，由於未夠15歲唔夠秤，扮大人之餘還要經常走鬼。79年來港發展前在新加坡已出過唱片，薄有名氣，在香港的第一間唱的夜總會是華盛頓，同場仲有徐小鳳；在尖東的翠麗華她唱了9年，後來自己頂來做，轉型時甚至成為全港最多卡拉OK房。自91年朱咪咪在紅館的《尹光演唱會》做嘉賓，令她廣為人知，也是她第一次扮徐小鳳，大受歡迎，此後每次登台客人都要求她扮她。
走埠歌后 師奶做到咁仲想點
3星期前還在吉隆坡，一星期前從紐約飛返香港半日，又再去美國，演出前一日，身在吉隆坡，演出後一日又飛回去，下次回來是9月……自從3年前與無綫改簽一年拍一齣劇，她近年瘋狂出埠，賭場認為她好腳頭，多倫多只去了4、5年，已破了多項紀錄，同一個地方連續3場；別人去賭場演唱要一兩年才翻兜，她一個月去兩次，資料顯示她是去得美國最多的歌手，「做師奶做到我咁，夫復何求！」她說在外地拍劇身價遠勝香港，在大陸拍了的50集處境喜劇《寶貝女兒好媽媽》還未播，新加坡拍的《九層高》破了收視紀錄。現在還為吉隆坡電視台拍攝劇集《愛在你左右》。「但唱歌才是我的主要收入，搵錢快、靚、正！」
朱咪咪搞嘢班子團
黑妹李麗霞扮肥媽、扮梅艷芳，唱到冇晒氣，佢同朱咪咪一齊玩足20幾年，玩嘢扮嘢，「她為人好率直，不像我婆媽，她有原則，絕不拖泥帶水，有人頂撞她第一時間收聲，不會破壞氣氛！」王俊棠：「我都算鬼馬，但對佢我五體投地！」祝文君甚至：「只要對住佢就會笑，絕無冷場，佢可以一隻歌玩你半粒鐘！」喬寶寶是晚輩：「佢教我放開懷抱去做，是個AllinOne的全能人物！」黎耀祥處男下海首次上大舞台演唱，扮羅文七情上面，小動作抵死啜核，聲線直如羅記翻生，但演出前的緊張程度，團中上下無人不知，佢話：「以後都唔敢再做喇，唔單止佢哋專業，連粉絲都好專業。」現場大樂隊領班黎學斌話：「同朱咪咪合作份外開心，很受尊重和關照，𠵱家啲新人連自己唱乜嘢Key都唔知！」
退休後回新加坡
咪咪姐在星馬和香港有8、9幢物業，身家數千萬，本可生活無憂，但她試過窮苦，認為：「有錢唔賺好折墮！我唔靚，冇後台，我一生都冇桃花，別人收好多利是，我一封都冇，所以要死做爛做。」明天去雲頂演唱，她最緊張是借出李香琴的八折月餅優惠，買兩盒白蓮蓉月餅回吉隆坡自己食。「我現在做人好開心，心情靚就容易想出好開心的東西，我不愛看悲劇，做人都已經咁苦！我的事業從來都不是我的理想，我的理想是孩子。」
你是很實際的人？「係！」她毫不猶豫，那你浪漫嗎？「我不是一個好浪漫的人，但我為了要回去同細仔做生日，說過了就一定要做到！退休後我會返新加坡一家團聚，那是我長大的地方，我不是香港人。」這句說話終於有點悲情。
